برطانوی پارلیمنٹیرینز نشابر کر ݙتے جو کشمیر عالمی سطح تے متنازعہ مسئلہ اے، وزیر خارجہ مخدوم شاہ محمود قریشی

اسلام آباد۔15جنوری(اے پی پی) وزیر خارجہ مخدوم شاہ محمود قریشی مقبوضہ جموں تے کشمیر، خطے اچ امن و امان اتے ملکی سیاسی صورتحال بارے آپݨے بیان اچ آکھیا جو پاکستان ٻہوں مطمئن  اے جو جیڑھی ڳالھیں اساں گزریل ݙوسالیں توں آکھدے ہاسے اڄ دنیا اونکوں منیندی پئی اے۔ جمعے کوں آپݨے بیان اچ انہاں آکھیا جو اساں کئی عرصے توں مقبوضہ جموں تے کشمیر اچ جاری بھارتی مظالم کوں دنیا دے سامھے اڄاگر کریندے پیوں۔ اڄ اوہا گونج برطانوی پارلیمنٹ اچ سݨیندی پئی اے، بھارت پروپیگنڈہ کریندا پیا ہئی جو اے انہاں دا اندرونی مسئلہ اے۔ برطانوی پارلیمنٹیرینز نشابر کر ݙتے جو کشمیر عالمی سطح تے متنازعہ مسئلہ اے جئیں تے سلامتی کونسل دی ٻہوں قرارداداں ہن اتے بھارت دا اندوری مسئلہ کائنی۔