عالمی ادارہ صحت دی 148ویں ایگزیکٹو کمیٹی دا اجلاس

 

جینوا۔19جنوری  (اے پی پی):عالمی ادارہ صحت دی 148ویں ایگزیکٹو کمیٹی دا آن لائن اجلاس شروع تھی ڳئے جیڑھا جو 26 جنوری تئیں جاری رہسی ۔ عالمی ادارہ صحت دے ڈائریکٹر جنرل ٹیڈروس ایدھانوم گیبریسس اجلاس دی افتتاحی تقریب توں خطاب کریندے ہوئیں آکھیے جو نوول کورونا وائرس دی وبا پھٹݨ دے ہک سال بعد ہی محفوظ اتے موثر ویکسین دی تیاری کیتی ڳئی جیڑھی جو شاندارسائنسی کامیابی اتے مستقبل کیتے امیداے ۔ تکھیے کھنڈݨ آلے متغیر وائرس پاروں ویکسینیشن دی اہمیت ٻئی ودھ ڳئی اے ۔اہم ویکسینیشن دے عمل اچ عدم مساوات ،ہک اہم خطرہ  اے۔ انہاں آکھیے جو ویکسین دی پہلی کھیپ سامݨے آندے ہی ویکسین تئیں منصفانہ رسائی کوں شدید خطرات دا سامݨاں کرݨا پوندا پئے ۔ہݨ تعیں چنڳی آمدݨ آلے گھٹ توں گھٹ 49 ملکاں اچ ویکسین دیاں ترائے کروڑ نوے لکھ خوراکاں ݙتیاں ڳئن ۔جݙاں جو ساریں توں گھٹ آمدݨ آلے ملک اچ صرف پنجوی خوراکاں ݙتیاں ڳئن ۔ انہاں سارے ملکاں توں اتحاد و تعاون دی اپیل کیتی۔