لاہور25جنوری(اے پی پی)گورنر پنجاب چودھری سرور آکھیے جو اپوزیشن اپݨی تسلی کر ڳھنے عمران خان ہی 2023 تئیں وزیراعظم ہین، ہر محاذ تے ناکامی دے بعد پی ڈی ایم ہݨ محفوظ رستہ ڳلیندی ودی اے۔ اے ڳالھ انہاں لاہور اچ صوبائی وزیر قانون راجہ بشارت نال ملݨ ویلھے آکھی۔ انہاں آکھیا جو حکومت ڈھواوݨ دی پی ڈی ایم دی سک انہاں دے دل اچ وی رہ ویسی کیوں جو لوک منتخب حکومت ڈھواوݨ آلیاں دے بالکل نال کائنی اتے ثابت قدمی ہی وزیراعظم عمران خان دی سنڄاݨ اے، پی ڈی ایم ݙیکھ ڳھنسی جو سینیٹ انتخابات وی تحریک انصاف جیتسی۔ وزیر قانون راجہ بشارت آکھیا جو حکومت عام لوکاں دے مسلے حل کرݨ اچ لڳی ہوئی اے، قوم کوں وزیراعظم تے اعتماد اے، اپوزیشن ناکام تھیسی اوکوں ہݨ احتجاج اتے جلسیاں دی ضد چھوڑ ݙیوݨی چاہیدی اے۔
