اسلام آباد۔19جنوری (اے پی پی):وفاقی کابینہ براڈ شٹ معاملے تے سپریم کورٹ یا ہائیکورٹ کورٹ دے ریٹائرڈ جج دی سربراہی اچ انکوائری کمیٹی دے قیام دی منظوری ݙتی اے ‘کمیٹی 45ݙٰنھ اچ اپݨی تحقیقات مکمل کریسی ، انکوائری کمیٹی براڈ شیٹ معاملے اچ شریف خاندان سودھے کرپشن اتے منی لانڈرنگ دے ذریعہ ٻاہرلے ملک اچ اثاثے بݨاوݨ آلے 200شخصیات ‘ 2000 توں ہݨ تئیں کیسز رکواوݨ ‘ معافی ݙیواوݨ آلے سہولت کاراں کوں سامݨے گھن آسی ، سبھے ذمے واراں دے خلاف کاروائی کیتی ویسی ،انکوائری کمیٹی جیں بندے یا ادارے کوں سݙے سݙ سڳدی اے ‘ براڈ شیٹ صرف شریف فیملی دی 850ملین دے اثاثیں دی نشاندہی کیتی اے ‘ شریف فیملی دنیا اچ کرپشن دے میدان اچ کرپشن دی ری ماڈلنگ کیتی ‘ سوئس بینک ‘ سرے محل ‘ اومنی گروپ ‘ ایوان فیلڈ اپارٹمنٹس کرپشن دیاں انڄ داستاناں ہن ‘ اپوزیشن ݙو دفعہ این آر او گھن چکی اے تے ہݨ تریجھے این آر او کیتے پھردی ودی اے ‘ پانامہ وانڳݨ براڈ شیٹ معاملہ وی عالمی سطح تے نشابر تھئے انہاں دی موجد پی ٹی آئی کائنی ‘ شہباز شریف 7.34ملین ڈالر نیب اچ جمع کرائے بعداچ چیف جسٹس افتخار چوہدری دے فیصلے تے نیب اے رقم شہباز شریف کوں واپس کر ݙتی۔ وفاقی وزیر اطلاعات و نشریات سینیٹر شبلی فراز ‘ وفاقی وزیر سائنس اینڈ ٹیکنالوجی فواد حسین اتے وفاقی وزیر انسانی حقوق شیریں مزاری منگل کوں پی آئی ڈی اچ سانجھی پریس کانفرنس کریندے پئے ہن ۔وفاقی وزیر اطلاعات و نشریات سینیٹر شبلی فراز آکھیے جو راولپنڈی اسلام آباد اتے مضافاتی عوام دا شکریہ جنہاں پی ڈی ایم توں لاتعلقی دا اظہار کریندے ہوئیں آپدا ویلھا بچائے ۔ پی ڈی ایم دی چھیکڑی کوشش ناکام تھئی اے انہاں آکھیے جو وزیراعظم عمران خان براڈ شیٹ معاملے تے کا بینہ دی ترائے رکنی کمیٹی تشکیل ݙتی ہئی جیں دا کنونئیر اچ جݙاں جو وفاقی وزرا فواد چوہدری اتے شیریں مزاری شامل ہن ، کابینہ دی ایں کمیٹی شفارشات تے انکوائری کمیشن بݨایا ڳیا جیڑھا جو براڈ شیٹ کیس اتے فیصلے تے مبنی تحقیقات کریسی ‘سپریم کورٹ یا ہائیکورٹ داریٹائرڈ جج ‘ ایف آئی اے اتے سینئر وکیل کمیٹی دے اراکین ہوسن ۔
