کراچی ۔27جنوری(اے پی پی)پاک جنوبی افریقہ کرکٹ ٹیسٹ دے ݙوڄھے ݙینھ جنوبی افریقہ دے 220 رنز دے ولدے اچ صرف 27 رنز تے چار بلے باز آوٹ تھیوݨ دے بعد فواد عالم، فہیم اشرف اتے اظہر علی قومی ٹیم دی پوزیشن تکڑی کر ݙتی اتے ڈوڄھے ݙینھ دا کھیݙ مکݨ تئیں پاکلستان 8 وکٹاں تے 308 رن بݨا ڳھدن اتے اوکوں 88 رنز دی وتھی مل ڳئی اے۔ فواد عالم شاندار 109 رنز سکور کیتن ڄݙاں جو آل راونڈر فہیم اشرف 64 رنز اتے اظہر علی 51 سکور کر تے قومی ٹیم کوں وتھی ݙیوا ݙتی اے۔ ایویں ہی وکٹ کیپر محمد رضوان وی قیمتی 33 رنز جوڑین۔ کھیݙ مکݨ تئیں وکٹ تے حسن علی 11 اتے نعمان علی 6 رنز نال موجود ہین۔ پاکستان ولوں عابد علی 4، عمران بٹ 9،کپتان بابراعظم 7 اتے شاہین شاہ آفریدی صفر تے آوٹ تھئے ہن۔ جنوبی افریقہ دے بالر کاگیسو ربادا، کیشیو مہاراج، این رچ نارٹ جی اتے لیونگی نگیڈی ݙو ، ݙو وکٹاں ڳھدن۔