اسلام آباد۔3فروری(اے پی پی):اڄوکے مالی سال اچ پاکستان ساریں توں ودھ درآمدات چین نال کیتن، ݙوجھے نمبر تے ودھ درآمدات متحدہ عرب امارات توں کیتیاں ڳئن اتے سنگا پور توں درآمدات تریجھے نمبر تے ہن ۔سٹیٹ بینک آف پاکستان (ایس بی پی) رپورٹ موجب اڄوکے مالی سال دے پہلے چھی مہینے اچ جولائی توں دسمبر 2020 اچ چین توں 5730.084 ملین ڈالر دیاں درآمدات کیتیاں ڳئن اتے گزریل مالی سال دے ایں ویلھے  دے دوران چین توں 4878.751 ملین ڈالر دی درآمدات کیتیاں ڳئیاں ہن ۔  گزریل مالی سال دے مقابلہ اچ اڄوکے مالی سال دی پہلےچھی مہینے اچ چین توں ڳھن تے آوݨ آلی درآمدات اچ 17.44 فیصد ودھارا ریکارڈ کیتا ڳئے۔ ݙوڄھے پاسے متحدہ عرب امارات توں کیتی ڳئی درآمدات اچ وی 9.39 فیصد گھٹکی نال 3643.20 ملین ڈالر دے مقابلہ اچ 3300.862 ملین ڈالر تئیں گھٹ تھئن تانڄو پاکستان یو اے ای نال ݙوڄھے نمبر تے ساریں توں ودھ درآمدات کیتیاں ڳئن۔ ایس بی پی موجب اڄوکے مالی سال اچ پاکستان تریجھے نمبر تے ساریں توں ودھ درآمدات سنگاپور توں کیتیاں ڳئن جیڑھی جو گزریل مالی سال دے پہلے چھ مہینے دے مقابلہ اچ اڄوکے مالی سال دے ایں ویلھے اچ 24.05 فیصد ودھارے نال 1081.356 ملین ڈالر دے مقابلے اچ 1341.440 ملین ڈالر تئیں پڄ ڳئن،اتے سعودی عرب نال کیتی ڳئی درآمدات اچ 38.75 فیصد اتے امریکا توں کیتی ڳئی درآمدات اچ 1.64 فیصد ودھارا تھئے۔