ملتان۔9فروری (اے پی پی):سرائیکی دے نامور شاعر احمد خان طارق دا چوتھا ورھیݨاں 10فروری کوں منایا ویندا پئے ۔ انھاں دا 2017 اچ انتقال تھیا ہئی ۔احمد خان طارق 1924 اچ شاہ صدر دین دے نیڑے وستی اچ ڄمیے ۔ انہاں نکے لا توں ہی آپݨے شعری سفر دا آغاز کیتا اتے ݙیکھدیں ہی ݙیکھدیں   انھاں دا شمار سرائیکی دے اہم شعرااچ تھیوݨ لڳیا ۔احمد خان طارق کوں سرائیکی ݙوہڑے دے حوالے نال سنڄاتا ویندا ہئی ۔ انھاں ݙوہڑے کوں روایتی مضمون دی بجائے نویں موضوعات ݙتے ۔ سرائیکی خطے دی ثقافت اتے معاشرت انہاں دی شاعری اچ جھلکدی ہئی ۔ ݙوہڑیں دے علاوہ انھاں گیت اتے غزلاں وی تخلیق کیتیاں۔ احمدخان طارق خطے اچ مشاعریں دی کامیابی دی ضمانت سمجھیے ویندے ہن ۔احمد خان طارق دے 7 شعری مجموعے منظرعام تے آئے جنھاں وچ”گھروں درتاݨے (1989)، متاں مال ولے(1995)، میکوں سی لڳدے(2001)، ہتھ جوڑی ڄل(2005)، عمراں داپوہرھیا (2007)، سسی(2011) اتے میں کیا آکھاں(2014)“ شامل ہن۔