ملتان۔17فروری(اے پی پی)سرائیکی دے مہاندرے شاعر، ادیب اتے دانشور  ارشاد تونسوی اللہ دے حضور پیش تھی ڳین۔ انہاں 75 سال حیاتی دے ݙکھ سکھ ݙٹھین اتے او 15 اکتوبر 1946ء کوں تونسہ شریف اچ ڄمیے ہن۔ انہاں پنجاب یونیورسٹی لاہور توں 1968ء اچ ایم۔ اے تاریخ کیتے اتے محکمہ اوقاف اچ ملازمت کیتی۔ ادبی حلقیاں اچ ارشاد تونسوی ہک سچے، کھرے تخلیق کار اتے نفیس انسان ہن۔ انہاں دا  شعری مجموعہ ’’ ندی ناں سنڄوک“سرائیکی ریسرچ سینٹر بہأ الدین زکریا یونیورسٹی ملتان 2006ء اچ چھاپیا ہا اتے ایکوں اکادمی ادبیات وی ایوارݙ ݙتے۔ ارشاد تونسوی او دانشور ہین جئیں لوکاں دے حقوق، وسیب نال پیار،خطے اتے اقدار دی سنڄاݨ کیتے ہر موقع تے الائے۔ انہاں دے پچھوکڑ اچ ہک پتر اتے دھی ہین ڄݙاں جو او اے پی پی سرائیکی سروس دی انچارج اتے نائب صدر نیشنل پریس کلب اسلام آباد ݙاکٹر سعدیہ کمال دے سوھرے وی ہین۔