اسلام آباد۔24فروری(اے پی پی)وزیر اعظم عمران خان دا دورہ سری لنکا مکݨ تے مشترکہ اعلامیہ جاری کیتا ڳئے جیندے اچ آکھیا ڳئے جو وزیراعظم عمران خان، وفاقی وزیراں، سینئر سرکاری حکام دے کٹھے سری لنکا دا دورہ کتیے جتھاں انہاں سری لنکن صدر گوتابایا راجہ پاکسے، وزیر اعظم مہندا راجہ پاکسے نال ملین اتے ݙوطرفہ تعاون، تجارت و سرمایہ کاری، مختلف شعباں اچ کثیرالجہتی تعلقات، وفود دے تبادلیاں، روابط ودھاوݨ، سیاسی مشاورت، مشترکہ اقتصادی کمیشن سیشن اتے کامرس سیکرٹریز دی ڳالھ مہاڑ ٹورݨ سودھا مختلف اداریاں وچال ڳانڈھے ودھاوݨ تے اتفاق کیتے۔ ایں سانڳے ”پر امن ہمسائیگی” سماجی و اقتصادی ترقی اچ تعاون، انسانی وسائل دی ترقی، تعلیمی و تکنیکی تعاون دا جائزہ ڳھدے۔ مذہبی سیاحت دے تبادلے، ثقافتی تعاون تے الایا۔ پاکستان یونیورسٹی آف پیرا ڈینیہ کینڈی اچ ایشین تہذیب اتے ثقافتی مرکز بݨاوݨ دا اعلان کیتے۔ ݙوہاں ملکاں ہک ارب امریکی ڈالر سالانہ ݙوطرفہ تجارتی حجم ہدف سانڳے پاک۔ سری لنکا آزاد تجارتی معاہدے کوں ٻیا ودھاوݨ تے اتفاق کیتے۔ ایں سانڳے کئی معاہدے وی کیتے ڳین۔ ڈوہاں وزیراعظماں مشترکہ طور پارلیمانی فرینڈشپ ایسوسی ایشن دی تشکیل نو تے اتفاق کیتے۔ وزیر اعظم عمران خان 50 ملین ڈالر نویں دفاعی کریڈٹ لائن سہولت دا وی اعلان کیتے اتے سلامتی، دہشت گردی، منظم جرائم اتے منشیات اسمگلنگ روکݨ سودھا انٹیلی جنس شیئرنگ تے ساڄھے داری دا آکھیا۔
