اسلام آباد۔5فروری (اے پی پی):وزیراعظم عمران خان آکھیے جو کشمیریاں دی منزل ہݨ پرے کائنی ، پاکستان کشمیریاں کوں حق خود ارادیت ملݨ تئیں انہاں دی حمایت جاری رکھیسی ، جے بھارت مخلص اے تاں اساں امن کیتے ݙو قدم اڳوں ودھݨ کوں تیار اوں لیکن کہیں کوں وی اساݙی امن و استحکام دی خواہش کوں اساݙی کمزوری سمجھݨ دی غلطی نی کرݨی چاہیدی ۔ جمعے کوں یکجہتی کشمیردے ݙینھ تے اپݨے ٹویٹ پیغام اچ وزیراعظم عمران خان آکھیے جو اڄ یکجہتی کشمیر دے ݙینھ دے موقع تے ایں عزم دا اعادہ کرݨ چاہنداں جو پاکستان کشمیریاں دے حق خود ارادیت دی جدوجہد اچ انہاں دے رلے کھڑے ، کشمیریاں دے حق خود ارادیت کوں اقوام متحدہ دی سلامتی کونسل دیاں ٻہوں ساریاں قرارداداں دے ذریعے بین الاقوامی برادری وی منیندی اے ۔ انہاں آکھیے جو بھارت ست عشریں توں کشمیر تے اپݨے غاصبانہ قبضے اتے جبر دے باوجود کشمیری عوام دے جذبہ آزادی اتے حق خودارادیت کیتے انہاں دی جدوجہد کوں کمزور نی کرسڳیا تے ہݨ کشمیریاں دی نویں نسل انہاں دی جدوجہد کوں ہک نویں عزم تے ولولے دے نال گھن تے اڳوں ودھدی پئی اے ۔ وزیراعظم آکھیے جو کشمیری عوام کیتے او پیغام ݙیوݨ چاہندن جو انہاں دے حق خود ارادیت دی منزل ہݨ زیادہ پرے کائنی ، پاکستان کشمیریاں کوں انہاں دا حق ملݨ تئیں انہاں دے رلے کھڑے ۔ وزیراعظم آکھیے جو پاکستان خطے اچ ہمیشہ امن دے ودھارے کیتے کم کیتے لیکن سازگار فضا قائم کرݨ دا ٻوجھ ہݨ بھارت تے ہے ۔
