اسلام آباد۔5مارچ  (اے پی پی) سرائیکی عوامی تریمت تحریک دی اگواݨ ادی نسرین اے پی پی دی سرائیکی نیوز سروس نال گالھ مہاڑ کریندے آکھے جو ہنڑ کلچرل ڈینھ زور شور نال منایا ویسی جیویں مادری زبسن دا ڈینھ منایا گے ۔ادی نسرین دا آکھنڑ ہا جو مادری زبانیں دے عالمی ݙینہہ تے سرائیکی عوامی تریمت تحریک تے سرائیکی عوامی سنگت دے ہیٹھ کراچی آرٹس کونسل آف پاکستان دے تھورے نال سرا ئیکی ماء ٻولی دا عظیم الشان کٹھ تھیاـ سرائیکی کٹھ دی صدارت رہبر سرائیکی عوامی تریمت تحریک ادی عابدہ بتول ، صدر سرائیکی عوامی سنگت مشتاق فریدی تے اڳواݨ ادا نزیر لغاری کیتی ـ کٹھ ءچ سینئر صحافی شاہد جتوئی ، ادی ساجدہ پروین ، ادی افصاء ملک ادی شائستہ جتوئی ، ادی رخسانہ حمید ، ادی انیلہ عابد ، عبدالخالق اِچھا ، ملک پرویز جوئیہ ، رشیدجراݨی ، شکیل انجم ، حمید علی ، خورشیدانجم ، عابد خان ، زاھد خان ، سلطان لاشاری ، خادم حسین اچوی وی شریک تھئے ـ کٹھ دا مونڈھ مہرین اصغر تلاوتِ قرآن پاک نال بدھیا تے حافظ سلطان کھوکھر خواجہ فرید دی کافی پیش کیتی کٹھ ءچ زونیرہ ایاز سعید ملح ، عریشہ عاصم ، اریبہ حمید ،سیرت(رانی بی بی) خدیجہ اِچھا ، ثناء حمید ، شانزہ شکیل ، رابعیہ ایاز تے سدرہ انقلابی نظماں سُݨا تے مجمعے کوں گرما ݙتا ـ کٹھ توں خطاب کریندے ہوئیں شاہد جتوئی آکھیا مادری زبانیں کوں ماݨ ݙیوݨ ملخ کوں مضبوط کرݨ اے . حکومت مادری زبانیں دے ودھارے کیتے انہاں کوں قومی زبانیں دا درجہ ݙیوے ـ ادی عابدہ بتول آکھیا ملخ اچ سبھ توں ودھیک ٻولی ونڄݨ والی سرائیکی ٻولی کوں قومی ٻولی نہ منݨ 7 کروڑ سرائیکی لوکاں کوں تسلیم نہ کرݨ اے . اساݙے نال بنگالیاں آلا سلوک کیتا ویندا پئے حکومت سرائیکی عوام دیاں محرومیاں ختم کرݨ سانگے سرائیکستان صوبہ بݨاوے تے پرائمری سطح توں سرائیکی ماء ٻولی تعلیمی نصاب دا حصّہ بݨائی ونڄے . ادا مشتاق فریدی آکھیا جو نشوم ٻالڑیاں دا جوش جزبہ ݙیکھ تے یقین تھی ڳئے جو سرائیکی قوم جاڳ پئی اے ہُݨ اساݙا حق کوئی غاصب نئیں کھا سڳدا ـ ادا نزیر آکھیا جو اپݨی ماء ٻولی کوں کݙھیں نہ وسارو . اپݨے گھراں ءچ سرائیکی ٻولو تے اپݨے ٻالاں کوں وی سرائیکی لازمی سکھاؤ پڑھاؤ . تہاݙی ماء ٻولی تہاݙی تے امدڑ نسلاں دی سنڄاݨ ہے .اپݨی سنڄاݨ تے ماء ٻولی وسرݨ ایویں ہے جیویں مرونڄݨ . کٍٹھ ءچ شریک ساݙے وسیب دے مہاندرے شاعر عبدالستار زائر ، نثار سحرش ، عمران عاقل اپݨا کلام سݨایا . پروگرام دے آخیر ءچ موسیقی ہئی ادی صفیہ ملک اپݨا سرائیکی ترانہ سݨایا ، سئیں اللہ ݙتہ تے وسیب توں آئے مہمان فنکار سئیں عاشق شاہ مشہور سرائیکی گیت سݨائے ـ کٹھ دی کمپیئرنگ ادی سعدیہ شکیل تے ادی نسرین گل نینا رل تے کیتی تے امید ظاہر کیتی اے جو سرائیکی ثقافت دا جہیاڑا جوش نال منایا ویسی ۔