اسلام آباد۔4مارچ  (اے پی پی) وزیراعظم عمران خان اقتصادی تعاون تنظیم (ای سی او) دے رکن ملکاں وچال مختلف شعبیاں اچ تعاون کوں ودھاوݨ سانڳے چھی نکاتی ایجنڈہ پیش کریندیں ہوئیں آکھیا جو ترقی سانڳے علاقائی تعاوں ٻہوں ضروری اے۔ اساں جغرافیائی محل وقوع، اقتصادی اثاثیاں اتے سیاسی رابطے توں فائدہ چاوݨ پوسی۔ کورونا جیہے چیلنجز دا مقابلہ کرݨ سانڳے صحت دے شعبے کوں ٻئی ترقی ݙیوݨی پوسی۔ سی پیک نال افغانستان سودھے مشرق وسطٰیٰ تئیں رسائی اہمیت رکھیندی اے، افغان امن عمل خطہ دی پائیدار ترقی اچ معاون ثابت تھیسی۔ کورونا وبا توں بچائو سانڳے عالمی سطح تے ویکیسن دی مساوانہ فراہمی ضروری اے۔ اے ڳالھیں انہاں خمیس کوں ای سی او دے 14 ویں سربراہ اجلاس نال ورچوئل خطاب کریندیں ہوئیں آکھی۔ ایں موقع تے وزیراعظم عمران خان ترکی دے صدر رجب طیب اردوان کوں اقتصادی تعاون تنظیم دے 14ویں سربراہ اجلاس سانڳے کرسی صدارت سنبھالݨ تے مبارک باد پیش کیتی اتے آکھیا جو ای سی او دا آندے اجلاس ترکمانستان اچ تھیسی۔ وزیراعظم صدر الہام علیوف کوں وی آذربائیجان دے مقبوضہ علاقے آزاد کراوݨ تے وی مبارخ ݙتی۔ وزیراعظم آکھیا جو کورونا وبا پاروں ای سی او رکن ملکاں صحت اتے معیشت دے شعبے اچ دنیا دے ٻے ملکاں وانگوں ٻہوں متاثر تھین۔ انہاں آکھیا جو ای سی او سربراہ اجلاس دا مقصد علاقائی اقتصادی ترقی بارے لائحہ عمل تے غور کرݨ اے۔ انہاں آکھیا جو معاشی اوکھ دے باوجود اساڈی حکومت غیر معمولی اقدامات کیتن۔ انہاں آکھیا جو کورونا دی صحت اتے معیشت تے اثرات دے علاوہ مذہبی نفرت وی سامھے آئی اے۔ دنیا دے مختلف ملکاں اتے اساڈے ہمسائے اچ اے صورتحال رہی اے مقبوضہ وادی اچ حق خودارادیت سانڳے جدوجہد کرݨ آلے لوکاں کوں کورونا وبا دی آڑ اچ کندھی نال لا ڈتا ڳئے اتے ظلم ودھا ݙتے ڳئن۔ وزیراعظم آکھیا جو ضروری اے جو اسلام کوں دہشت گردی نال جوڑݨ دی ہر کوشش کوں ناکام بݨایا ونجے۔ دہشت گردی کوں اسلام نال جوڑݨ مسلماناں نال وݙی زیادتی اے۔ اینویں آزادی اظہار رائے دی آڑ اچ حضور اکرمۖﷺ دی شان اچ گستاخی کوں وی برداشت نی کیتا ونڄ سڳدا۔