اسلام آباد۔8مارچ (اے پی پی) صدر مملکت ڈاکٹر عارف علوی آکھیا جو تریمتیں اتے خصوصی لوکاں سودھے معاشرے دے محروم طبقات کوں قومی دھارے اچ رلائے بغیر ترقی دے مطلوبہ نتیجے نی مل سڳدے۔مختلف شعبیاں اچ کامیاب تریمتیں دی محنت اتے جدوجہد کوں ماڈل دے طور پیش کیتا ونجے، میڈیا اتے علما کرام تریمتیں کوں انہاں دے حقوق ݙیوݨ بارے شعور ڈیوݨ اچ آپݨا کردار ادا کرے۔ اے ڳالھیں انہاں سنوار کوں ایوان صدر اچ تریمتیں دے عالمی ݙینھ دے مناسبت نال تھیوݨ آلی تقریب نال خطاب کریندیں ہوئیں آکھی۔ وفاقی وزیر برائے انسانی حقوق شیریں مزاری، وفاقی وزیر برائے بین الصوبائی رابطہ ڈاکٹر فہمیدہ مرزا، وفاقی وزیر برائے دفاعی پیداوار زبیدہ جلال، یو این ویمن دی پاکستان اچ کنٹری ہیڈ شرمیلا رسول اتے پاکستان اچ یورپی یونین دی سفیر ایندرلاکامینارا وی تقریب نال خطاب کیتا۔ تقریب اچ ارکان پارلیمنٹ، غیر ملکی سفارتکاراں اتے زندگی دے مختلف شعبیاں اچ نشابر خدمات ݙیوݨ آلی تریمتیں وی شرکت کیتی۔ صدرمملکت آکھیا جو مجموعی ترقی سانڳے تریمتیں کوں بااختیار بݨاوݨ ضروری اے۔ انہاں آکھیا جو پرے دے اتے پسماندہ علاقیاں دی تریمتیں دی صحت دے مسئلے پاروں فوری طبی مشورہ سانڳے ٹیلی ہیلتھ سروس دا انتظام تھیوݨا چاہیدے۔ انہاں آکھیا جو حکومت تریمتیں دی سہولت سانڳے سوکھے قرضے ݙیوݨ دی سکیم متعارف کرائی اے جڈانجو تریمت دی اکثریت کوں ایں بارے پوری آگاہی نہ ہووݨ پاروں ایں سہولت توں فائدہ نی چا سڳدی۔ صدرمملکت بالڑیاں دی تعلیم دی اہمیت تے زور ڈیندیں ہوئیں ایں بارے سازگار ماحول بݨاوݨ دی لوڑھ تے زور ڈتے اتے آکھیا جو زندگی دے مختلف شعبیاں اچ کامیاب تریمتیں دی محنت اتے جدوجہد کوں مثال دے طور پیش کیتا ونجݨا چاہیدے۔
