رپورٹ: ظہیر الحق
ترجمہ : ڈاکٹر سعدیہ کمال
اسلام آباد۔7مارچ(اے پی پی) ملک اچ ادارہ جاتی اصلاحات اتے مختلف سرکاری اداریاں تے محکمیاں دی کارکردگی اچ ودھارا اتےاخراجات اچ گھٹکی دے ذریعے انھاں دے امور کوں بہتر بنڑاونڑ تےاقتدار اچ آونڑ آلیاں متعلقہ حکومتاں تے ہک وڈی ذمے واری ہئی۔
ہر گزردےڈینھ نال پاکستان ریلویز، قومی فضائی کمپنی (پی آئی اے) اتےپاکستان سٹیل ملز جہیں وڈے سرکاری اداریاں دے نال نال ڈوجھے نکے اداریاں دے نظم تے نسق اچ مسلسل انحطاط اتے مالیاتی عدم موزونیت واضح طور تے ڈٹھی گئی۔
وزیراعظم عمران خان دی قیادت اچ موجودہ حکومت سرکاری اداریاں اچ اصلاحات دے تحت انھاں کوں مالی طور تےخود مختار بنڑاونڑ اتے کارکردگی اچ چنگائی دی ذمے واری گھدی اے ۔ایں سلسلہ اچ ممتاز اقتصادی ماہر اتے معروف اصلاحات پسند ڈاکٹر عشرت حسین کوں ایں کم کیتے وزیراعظم دا مشیر تعینات کیتا گیا اے
اصلاحات دی ضرورت،اہمیت اتے عملدرآمد دی صورتحال تے روشنی سٹیندے ہوئے ڈاکٹر عشرت حسین آکھے جواے ہک اوکھا کم اے جیڑھا ایں واری مرحلہ وار انداز اچ کیتا ویندا پیا اے ۔ انھاں امید ظاہر کیتی اے جو قوم دی تعمیرنو اچ سرکاری اداریاں دے معاون کردار دے پیش نظر انھاں اداریاں کوں درست سمت آلے پاسے کرتے مطلوبہ نتجہ گھدا ونج سگیندا اے۔ ’’اے پی پی‘‘ نال خصوصی گالھ مہاڑ کریندے ہوئے انھاں آکھے جو اصلاحات دے عمل کوں چار حصیاں اچ تقسیم کیتا گیا اے۔ پہلے مرحلے اچ وفاقی اداریاں اچ ہکی طرح دے کم کرنڑ آلے اداریاں کوں آپت اچ ضم کرتے انھاں دی تعداد گھٹ کیتی کی گئی اے۔ ڈاکٹر عشرت حسین آکھے جو بغیر کہیں مستقبل دی منصوبہ بندی دے سرکاری اداریاں دی تعداد 441 تئیں ودھ چکی ہئی، اساں کجھ اداریاں دے بند کرنڑ یا نجکاری دے ذریعے انھاں دی تعداد کوں 342 تئیں گھٹ کیتا اے ۔
ڈوجھے مرحلہ بارے ڈاکٹر عشرت حسین ڈسائے جو پی آئی اے ، پاکستان ریلویز، پاکستان سٹیل ملز اتے ڈوجھے سرکاری اداریاں دی بحالی ، تعمیرنو اتے تشکیل نو دے اقدامات کیتے ویندے پئین ، اساں انھاں اداریاں کوں حکومت دے ماتحت یا پاکستا ن سٹیل ملز وانکنڑ پبلک- پرائیویٹ شراکت داراں دے تحت منافع بخش بنڑاونڑ دے خواہشمند ہن
ڈاکٹر عشرت حسین بیا آکھے جو سول سروسز دی اصلاحات دا عمل ادارہ جاتی اصلاحات دا تریجھا اہم قدم اے۔ انھاں آکھے جو وڈیاں اصلاحات کوں حتمی شکل ڈتی ونج چکی اے اتے کئی تے تاں عمل وی کیتا گیا اے ۔ انھاں آکھے جو میڈی نظر اچ ملک دی سول سروسز اچ کارکردگی دی جانچ پڑتال اتے ترقی دی پالیسی، سول سروسز دی بنیادی کمزوریاں ہن کیونجو پہلے توں موجود پالیسی توں اساں چنگی یا بری کارکردگی دے حامل سول سرونٹس اچ فرق نہ کر سگدے ہاسے ۔ انھاں آکھے جو ملازماں دی سالانہ کانفیڈنشل رپورٹ (اے سی آر) تے انحصار کرنڑ دی بجائے ملازماں دی کارکردگی جامچنڑ کیتے کارکردگی دے کلیدی اعشاریے متعارف کرائے گئین ۔ہنڑ محض سنیارٹی دی بنیاد تے ترقی نہ تھیسی جڈاں جو کارکردگی، ٹریننگ اتے اہلیت دی بنیاد تےترقی ڈتی ویسی ۔
ڈاکٹر عشرت حسین ڈسایا جو پروموشن رولز نافذ کیتے گئے تاں کہیں انھاں کوں عدالت اچ چیلنج وی کیتا ھا پر فیصلہ ڈتا گیا جو رولز میرٹ تے بنڑائے گین اتے انھاں اچ کجھ غلط کائینی ۔ انھاں آکھے جو سول سروس ریفارمز دے تحت وفاقی حکومت دی آسامیاں 6 لکھ 40 ہزار توں 5 لکھ 70 ہزار تئیں گھٹ کیتیاں ویندیاں پئین اتے ایں حوالہ توں گریڈ ہک توں 16 دی 70 ہزار آسامیاں کوں ختم کیتا ویندا پیا اے ۔ انھاں آکھے جوایں طرح دی کیتی ونجنڑ آلی بچت توں سول سرونٹس دیاں تنخواہاں ودھایاں ونج سگدیاں ہن ۔
ایں طرح سینٹرل سپیریئر سروسز (سی ایس ایس) دی اصلاحات تے وی غور کیتا ویندا پیا اے۔ انھاں آکھے جواصلاحات دے پیکیج دے نفاذ دے بعد پروفیشنلز دی ترقی دے مواقع ودھسن ۔ اساں نیشنل ایگزیکٹو سروس کوں عام ملازماں اتےماہرین دی درجہ بندی دی تجویز ڈیندے پئین ۔ انھاں آکھے جو سی ایس ایس دے امتحانات دے طریقہ کاردی تنظیم نو دے تحت امیدواراں توں پچھیاونجنڑاں چاہیدا اے جو او آپدی دلچسپی دے مضامین دے امتحان ڈے تے آپدی مرضی دی سروس اچ شامل تھی سگدن ۔ انھاں آکھیا جو قومی سطح دے مقابلہ دے امتحان اچ شرکت توں پہلے امیدواراں کوں آپدی دلچسپی دے شعبے دا انتخاب کرنا ہوسی۔
اصلاحات دے چوتھے مرحلہ بارے ڈاکٹر عشرت حسین آکھئے جو دفتری طریقہ کارکوں پرانڑے فائل سسٹم دی بجائے الیکٹرانک آفس ورک (ای آفس) اچ تبدیل کیتا ویندا پیا اے ۔ تمام تر مواد ویب سائٹ تے دستیاب ہوسی اتے کئی کیسز اچ عوام کوں دفتراں دے چکر نہ لاونڑے پوسن ۔ انھاں آکھے جو ادارہ جاتی اصلاحات دے چاریاں مرحلیاں تے عملدرآمد مختلف مراحل اچ اے تے اے عمل آونڑ آلے ڈینھاں اچ تکھا کیتا ونجے۔انھاں آکھے جو جولائی 2019 اچ وفاقی حکومت محکمیاں دی تنظیم نو دی منظوری ڈتی ہئی تھی تے ہک عملدرآمد کمیٹی فیصلیاں دے نفاذکوں یقینی بنڑائی ویندی پئی اے ۔
پالیسی ادارہ برائے پائیدار ترقی (ایس ڈی پی آئی) دے ایگزیکٹو ڈائریکٹر ڈاکٹر عابد قیوم سلہری ادارہ جاتی اصلاحات دے حوالہ نال آکھیا جو ادارہ جاتی اصلاحات صرف قوانین اتے پالیسیز اچ ترامیم ای نی جڈاں جواے رویہ جاتی انتظام کار وی اے۔ انھاں آکھیا جو اصلاحات کوں کامیاب بنڑاونڑاں وڈا اہم اے، اساکوں صرف قوانین اچ سادہ جہی تبدیلی کیتی ای نی جڈاں جو دہائیاں پرانڑی ذہنیت کوں وی بدلنڑ دی ضرورت اے۔انھاں آکھے جو پاکستان ہک ایجھا ملک اے جتھاں پالیسیز اتے رولز دی کوئی کمی کائینی پر انھاں دے نفاذ اتے عمل کرنڑ اچ گھٹکی اے ۔ انھاں آکھے جواساکوں بدلدے ہوئے عالمی رجحانات تے توجہ ڈیونڑاں ہوسی اتے کم کرنڑ دے جدید اتے طریقہ کار آلے پاسے ودھنڑا ہوسی۔ وزیراعظم دے مشیر برائے ادارہ جاتی اصلاحات ڈاکٹر عشرت حسین ولوں اصلاحات دے عمل کوں کامیاب بنڑاونڑ دیاں کاوشاں دی تعریف کریندے ہوئے ڈاکٹر عابد قیوم سلہری آکھئے جو ہکی واری اتے قلم اصلاحات کوں متعارف کراونڑ دی بجائے وزیراعظم دے مشیر مرحلہ وار اصلاحات کوں متعارف کرویندے پئے ہیں ۔ انھاں آکھے جو اصلاحات دا مرحلہ وار نفاذ ہک خوش آئند امر اے ۔ انھاں آکھیا جو ادارہ جاتی اصلاحات دے تحت غیر فعال سرکاری اداریاں کوں ضم یا ختم کرتے اداریاں دی تعداد گھٹ ودھ ساڑھے چار سو توں گھٹ کر تے ساڑھے ترائے سو تئیں کیتی گئی اے۔ سول سروسز ریفارمز دے حوالہ نال ڈاکٹر عابد قیوم سلہری آکھئے جوایں سلسلہ اچ وی مرحلہ وار اصلاحات دا عمل جاری اے جیڑھا ہک چنگا عمل اے۔ انھاں آکھئے جو اصلاحات دا عمل آہستہ آہستہ اتے انھاں تے مکمل عملدرآمد دا متقاضی اے۔ انھاں آکھے جو اصلاحات دا مطلب رویاں اتے انتظامی طریقہ کاراچ تبدیلی گھن آونڑا اے اتے ایں سلسلہ اچ اصلاحات توں خوفزدہ گروپاں دی رائے گھننڑ وی ضروری اے کیونجو بصورت دیگر اصلاحات توں مطلوبہ نتیجے نی گھدے ونج سگیندے۔
