عوامی تریمت تحریک سرائیکی کلچرل ڈینھ دیاں سرائیکی وسیب کوں مبارخاں ڈیندے ہوئے بالاں کوں سرائیکی بولنڑ دا سنہیا ڈتا اے ۔اگوانڑ ادی عابدہ بتول دی اے پی پی نال گالھ مہاڑ

اسلام آباد۔5مارچ  (اے پی پی) ادای عابدہ بتول دا آکھنڑ ہا جو سرائیکی عوامی سنگت پاکستان احمد پور شرقیہ دے تھورے نال جناح ہال ءچ سئیں سفیر لاشاری تے سئیں انجم لاشاری دی یاد ءچ شاندار پروگرام دا انعقاد کیتا جیندے وچ سرائیکی عوامی سنگت پاکستان  تے سرائیکی عوامی تریمت تحریک پاکستان دے اڳواݨیں سمیت وسیب دے مہاندرے دانشور ، لکھاری، صحافی ، شُعراءکرام ،ایڈوکیٹس تے تحریکی سنگتی ودھیک تعداد ءچ شریک تھئے . اے ادبی بیٹھک ترائے حصیاں تے مشتمل ہئی ہک حصہ مشاعرہ ، ݙوجھا ڳالھ مہاڑ تے تریجھا حصہ موسیقی ـادبی کٹھ دی صدارت سرائیکی عوامی سنگت دے اڳواݨ سئیں نزیر لغاری ، صدرسئیں مشتاق احمد فریدی تے جام محمد علی لاڑ کیتی،پروگرام دامونڈھ  تلاوتِ قرانِ پاک تے خواجہ فرید دی کافی نال ٻدھیا ڳیا . ساݙے وسیب دے مہاندرے شاعر سئیں غیور بخاری ، شاہد عالم شاہد تے غلام عباس غمگین  اپݨا کلام سݨایا . ادی ارم بشیر گھوٹیہ تے شانزہ لاشاری سئیں سفیرلاشاری تے انجم لاشاری دیاں نظماں پڑھیاں . ادا اکبر انصاری ،ادا ڄام محمد علی ادا مشتاق فریدی ،  ،ادا جہانگیرمخلص تے  نزیر لغاری سفیر لاشاری سئیں تے انجم لاشاری سئیں دیں ادبی خدمات تے  ڳالھ مہاڑ  کیتی تے خراج عقیدت پیش کیتا،اخیر ءچ استاد ملنگ حسین اپݨے کمال فن دا مظاہرہ کیتا .سرائیکی عوامی سنگت  احمد پور شرقیہ دے عہدےدار تے تنظیمی بھرانویں کوں کامیاب تے شاندار پروگرام دیاں ڈھڳ ڈھڳ مبارخاں ڈتیاں تے سرائیکی کلچر ڈینھ کوں بھرپور مناونڑ سانگے امید ظاہر کیتی اے۔