اسلام آباد۔6مارچ (اے پی پی) قومی اسمبلی وزیراعظم عمران خان تے اعتماد دی قرارداد دی منظوری ݙے ݙتی اے ۔ مجموعی طور تے پاکستان تحریک انصاف اتے اوندی اتحادی جماعتاں دے 178 ارکان وزیراعظم عمران خان تے اعتماد کیتا۔ آئین دے آرٹیکل 91 دی ذیلی شق 7 دے تقاضے کوں پورا کریندیں ہوئیں قومی اسمبلی دا اجلاس سݙیا ڳیا ہئی۔ وزیراعظم جئیں ویلھے 2018 ء اچ وزارت عظمیٰ دا منصب سنبھالیا ہئی تاں اوں ویلھے قومی اسمبلی دے 176 ارکان اعتماد دا ووٹ ݙتا ہئی۔ ہفتے کوں قومی اسمبلی دے اجلاس سپیکر اسد قیصر دی صدارت اچ تھیا۔ اجلاس دے شروع تے وزیر خارجہ شاہ محمود قریشی قرارداد پیش کیتی جواےایوان اسلامی جمہوریہ پاکستان دے دستور دے آرٹیکل 91 دی شق (7) دی مقتضیات دے مطابق اسلامی جمہوریہ پاکستان دے وزیراعظم عمران خان تے اعتماد دا اظہارکریندے۔ سپیکر اعتماد دے ووٹ سانڳے عمل شروع کیتا اتے ایوان اچ پنڄ منٹ تئیں گھنٹیاں وجاوݨ دا حکم ݙتا۔ قومی اسمبلی دے ارکان ہک ٻئے دے بعد ونڄ کراہیں آپݨا ووٹ رجسٹر کرایا۔ وزیراعظم عمران خان وی سارے ارکان دے رلے لابی اچ ونڄ کراہیں آپݨا ووٹ رجسٹرڈ کرایا۔ ووٹنگ دا عمل پورا تھیوݨ تے سپیکر قرارداد دے حق اچ ووٹ دی تعداد دا اعلان کیتا۔ انہاں ایوان کوں ݙسیا جو وزیراعظم دے حق اچ اعتماد دی قرارداد منظورتھی ڳئی اے۔سپیکر آکھیا جو ایں توں پہلے اگست 2018ء اچ عمران خان 176 ووٹ گھن کراہیں وزیراعظم بݨیے ہن جڈانجو ہݨ اڈھائی سال بعد 178 ووٹ ڳھدن۔
