کرپشن دے خاتمے اچ پورے معاشرے دا اہم کردار اے، اے کم صرف قوانین نال نی تھی سڳدا، وزیراعظم عمران خان دا ہفتے کوں قومی اسمبلی اچ اعتماد دا ووٹ گھنݨ دے بعد خطاب

اسلام آباد۔6مارچ  (اے پی پی) وزیر اعظم عمران خان قومی دی ترقی اچ اخلاقیات، نظریہ اتے انصاف دی اہمیت کوں اجاگر کریندیں ہوئیں آکھیا جو کرپشن دے خاتمے اچ پورے معاشرے دا اہم کردار اے، اے کم صرف قوانین نال نی تھی سڳدا، جزا اتے سزا دے تصور دے بغیر انصاف ممکن کائنی، مجمرماں کوں سزائیں ݙیوݨ سانڳے اساݙی حکومت نیب اتے عدالتاں کوں درکار پورا تعاون کریسی۔ اپوزیشن دی ساری کوششاں دے این آر او سانڳے ہن، پاکستان کوں اڳوں ودھݨ توں کوئی نی روک سڳدا۔ مہانگ گھٹ کرݨ اتے تلویں طبقے دی اوکھ دور کرݨ سانڳے کم کریندی پیوں۔ اساں انتخابی اصلاحات دے تحت الیکٹرانک ووٹنگ مشین دا نظام گھن امسوں تانجو دھاندلی دی شکایت یکا سانڳے مُک ونڄے۔ ہفتے کوں قومی اسمبلی توں اعتماد دی قرارداد دی منظوری دے بعد خطاب کریندیں ہوئیں وزیراعظم عمران خان آکھیا جو ساریاں توں پہلے اتحادیاں، اراکین اتے آپݨی ٹیم دا شکریہ اداکرینداں۔ انہاں آکھیاجو گزریل ݙینھ حالات کوں ݙیکھدیں ہوئیں حفیظ شیخ دی ہار تے سارے تکلیف اچ ہن، اوں ویلھے ہک ٹیم نظر آوݨ میکوں ٻہوں چنڳا لڳیا، ہݨ اساݙی ٹیم مضبوط تھیندی ویسی۔ اللہ قرآن اچ ایمان کوں ازماوݨ دی ڳالھ اینکوں مضبوط کرݨ سانڳے آکھدے۔ آزمائش توں نکل کراہیں انسان دا ایمان پکا تھی ویندے۔ وزیراعظم آکھیا جو میں وزیرتعلیم کوں ہدایت کیتی اے جو ستویں توں نانویں جماعت دے نصاب اچ نبی ﷺ دی حیاتی اتے مدینہ دی ریاست بارے اسباق شامل کرن تانجو ٻالاں کوں ایں ملک دے بݨݨ دا مقصد پتہ لڳے۔ انہاں آکھیا جو میکوں تکلیف تھیندی اے جئیں ویلھے مغربی ملکاں اچ وینداں تاں انہاں دی اخلاقی معیار ݙیکھ کراہیں شرم امدی اے اتے افسوس تھیندے جو اساڈا ملک لا الہ الا اللہ دی بنیاد تے بݨیا ہئی اتے اتھاں کیا تھیندا پئے۔ انہاں آکھیا جو آصف علی زرداری جینکوں پوری دنیا کرپٹ ثابت کیتے، ایں ملک اچ ہک زرداری ساریاں تے بھاری دے نعرے لگین کیونجو او پیسے ݙیندے۔ نواز شریف ڈاکو، ملک توں کوڑ مار تے بھج ڳئے۔ انہاں آکھیا جو انہاں دا منصوبہ اے ہئی جو اڈھائی سال توں وڈے وڈے ڈاکو کٹھے تھی کراہیں عمران خان تے اتنا دبائو پاون جو جنرل مشرف وانگوں او انہاں کوں این آر او ݙے ڈیوے۔ وزیراعظم آکھیا جو جئیں ویلھے میں وزیراعظم منتخب تھیا تاں پہلے ݙینھ میکوں ایوان اچ تقریر نی کرݨ ݙتی ڳئی کیونجو انہاں کوں ݙر ہئی جو کرپشن دے کیسز معاف کائنا کریسی، اے کیسز اساں نی بݨائے بلکہ انہاں دے آپݨے دور اچ بݨائے ڳئن۔ نیب دا چیئرمین انہاں دا لاتا ہوئیا ہئی۔ انہاں آکھیا جو فیٹف دی بلیک لسٹ پاروں پابندیاں لگݨ دا ڈر ہئی، مسلم لیگ ن دے دور اچ گرے لسٹ اچ گیا ہئی، اساں قانون سازی سانڳے اے نیب اچ 34 شقاں ترمیم سانڳے گھن آئے۔ انہاں دا مقصد ہئی جو انہاں دی چوری لک ونڄے۔ انہاں آکھیا جو اوپن بیلٹ کیوں ضروری ہئی، 2008 اچ ݙوہیں جماعتاں آکھیا جو اوپن بیلٹ ہووے، ہݨ ایں توں بھج ڳئن۔ انہاں دی کوشش ہئی جو حفیظ شیخ ہر ونڄے، انہاں کرپٹ ترین لیڈر یوسف رضاگیلانی کوں جتوا ݙتا۔ وزیراعظم آکھیا جو پاکستان اوکھے دور توں نکل کراہیں اڳوں ودھدا پئے۔ کرنٹ اکائونٹ خسارہ سرپلس اچ آڳئے۔ ہݨ ودھ ڈالر امدے پئن۔ روپیہ ٹکدا ویندے۔ اے اہم ویلھا اے، ساری دنیا دی معیشت کورونا پاروں متاثر تھئی اے۔ اللہ دی مدد اتے آپݨی ٹیم دی محنت نال لوکاں کوں بچائے۔ اسد عمر، ڈاکٹر فیصل کوں خاص طور تے مبادک ڈیوݨ چاہنداں۔ انہاں آکھیا جو اساݙا چیلنج ایکسپورٹ ودھاوݨ اے۔ انہاں آکھیا جو ساریاں توں ودھ دبائو مہانگ دا اے،روپیہ ڈھندے تاں مہانگ ودھدی اے، حکومت مہانگ دا بوجھ گھٹ کرݨ تے کم کریندی پئی اے۔