اسلام آباد۔8اپریل  (اے پی پی):وزیرِ اعظم عمران خان نواں پاکستان ہاؤسنگ اتھارٹی دے منصوبے فراش ٹاؤن اپارٹمنٹس اسلام آباد دا سنگِ بنیاد رکھ ݙتے۔ اے منصوبہ ایف ڈبلیو او، سی ڈی اے اتے نیا پاکستان ہاؤسنگ اینڈ ڈویلپمنٹ اتھارٹی دی سانجھ نال 3 سال دی مدت اچ مکمل تھیسی ۔ خمیس کوں وزیراعظم آفس دے میڈیا ونگ توں جاری بیان موجب منصوبے اچ جدید سہولتاں توں آراستہ 3960 فلیٹس بݨائے ویسن جیڑھے جو مکیناں کوں سستی رہائش ݙیسن ۔84 ایکڑ تے محیط ایں منصوبے اچ وزیر اعظم دے ویژن دے مطابق متوسط طبقے اتے کچی آبادیاں دے مکیناں کیتے خصوصی طور تے فلیٹس مختص کیتے ڳئن ۔ منصوبے دے ماحولیاتی پہلو کوں سامݨے رکھیندے ہوئیں گرین بیلٹس اتے پارکس دے قیام کوں وی خصوصی ترجیح ݙتی ڳئی اے ۔ وزیر اعظم ایں موقع تے ٻوٹا وی لاتا ۔وزیر اعظم دی موجودگی اچ منصوبے دے ایم-او-یو تے وی دستخط کیتے ڳئن ۔ تقریب اچ وفاقی وزیرِ داخلہ شیخ رشید احمد،  وزیراعظم دے معاونِ خصوصی ذوالفقار عباس بخاری، سینیٹر فیصل جاوید، چیئرمین نیا پاکستان ہاؤسنگ اینڈ ڈویلپمنٹ اتھارٹی لیفٹیننٹ جنرل (ر) انور علی حیدر اتے متعلقہ اعلی افسران  شرکت کیتی۔