اسلام آباد۔22اپریل (اے پی پی) صدر مملکت ڈاکٹر عارف علوی آکھیا جو سعودی عرب اچ پاکستانی کمیونٹی کوں درپیش مسائل حل کرݨ تے توجہ ݙتی ونجے۔ اے ڳالھیں انہاں سعودی عرب سانڳے پاکستان دے نامزد سفیرلیفٹیننٹ جنرل (ر) بلال اکبر نال ڳالھ مہاڑ کریندیں ہوئیں آکھی جنہاں خمیس کوں ایوان صدر اچ انہاں نال ملاقات کیتی۔ صدرمملکت آکھیا جو پاکستان سعودی عرب نال تعلقات کوں ٻہوں اہمیت ݙیندے۔ ݙوہیں ملکاں وچال سانجھے تاریخ ، ثقافت ، روایات ، عقیدے اتے اقدار دا رشتہ اے۔ انہاں نامزد سفیر کوں مبارکباد ݙتی اتے امید کیتی جو او پاکستان اتے سعودی رب وچال ݙو پاسہ اقتصادی تعاون اتے سرمایہ کاری کوں ٻیا ودھاوݨ سانڳے کوشش کریسن۔
