مسلم ملکاں دے سربراہ رل تے مغربی دنیا کوں باور کراون جو توہین رسالت ﷺ نال مسلماناں دے جذبات مجروح تھیندن، ایجھی رسالتﷺ دی مذموم کارروائیاں دے سدباب سانڳے انہاں کوں قائل کرن، وزیراعظم عمران خان دا قوم نال نشریاتی خطاب

اسلام آباد۔19اپریل (اے پی پی) وزیراعظم عمران خان ناموس رسالتۖ دے حساس معاملے اچ مسلم امہ دی اجتماعی ذمہ واری اتے اہمیت کوں اجاگر کریندیں ہوئیں آکھیا جو مسلم ملکاں دے سربراہ رل تے مغربی دنیا کوں باور کراون جو توہین رسالت ﷺ نال مسلماناں دے جذبات مجروح تھیندن، ایجھی رسالتﷺ دی مذموم کارروائیاں دے سدباب سانڳے انہاں کوں قائل کرن۔ایں بارے مہم دی خود قیادت کریساں اتے ذمہ واری گھنداں جو قومی اتے مسلم امہ کوں مایوس کائنا کریساں۔ پوری مسلم امہ رل تے ای ایں مسئلے نال نبݨ سڳدی اے۔ علماء کرام کوں اجوکی صورتحال اچ اڳوں آوݨا چاہیدے اتے حکومت دے نال تھیوݨا چاہیدے۔ میں وزیراعظم دی حیثیت نال مغربی ملکاں اچ اسلاموفوبیا دا معاملہ اقوام متحدہ اتے اسلامی تعاون تنظیم سودھی بین الاقوامی فورم تے چاتے۔ معیشت مضبوط تھیندی پئی اتے سدھے پاسے ویندی پئی اے۔ احتجاجی مظاہریاں نال معیشت متاثر تھیسی اتے غربت ودھسی۔ اے ڳالھیں انہاں سنوار کوں قوم نال نشریاتی خطاب کریندیں ہوئیں آکھی۔ وزیراعظم عمران خان آکھیا جو پاکستان کلھا ملک اے جیڑھا جو اسلام دے ناں تے بݨیے، دنیا اچ حضور اکرمۖ ﷺ دی شان اچ کتھائیں وی گستاخی تھیوے تاں پوری دنیا خصوصی طور پاکستان دے مسلماناں کوں ٻیوں تکلیف تھیندی اے۔ اساں چاہندوں جو کہیں وی جاہ تے اساݙے نبی کریم ۖ ﷺ دی شان اچ گستاخی نہ تھیوے۔ انہاں آکھیا جو ناموس رسالتﷺ دے معاملہ تے سارے مسلم ملکاں دے سربراہواں کوں خط لکھے، جئیں ویلھے 50 مسلمان رل تے آپݨا موقف پیش کریسن تاں اوندا ودھ اثر تھیسی۔ انہاں آکھیا جو اے ویلھا کٹھا تھیوݨ دا اے۔ پچھلے ہفتے اچ افسوسناک حالات تھین، ایں پاروں میں قوم نال مخاطب تھیوݨ دا فیصلہ کیتے، وزیراعظم آکھیا جو جئیں وجہ پاروں ٹی ایل پی لوکاں کوں سڑکاں تے کڈھیندی پئی اے میݙا مقصد وی اوہو اے، اساں وی چاہندوں جو اساݙے نبیۖ کریم ﷺ دی شان اچ گستاخی نہ تھیوے۔ پر طریقہ کار دا فرق اے۔ انہاں آکھیا جو ٹی ایل پی وی مظاہرے کریندی پئی اے، پہلے وی کیتن پر کیا فرانس دے سفیر کوں کݙھݨ نال یا تعلقات ختم کرݨ نال اے سلسلہ رُک ویسی، کیا کوئی گارنٹی اے؟ انہاں آکھیا جو میں مغرب کوں جاݨداں اگر ایجھا رد عمل کریسوں تاں کہیں ٻئے یورپی ملک اچ ایجھا واقعہ تھیسی کیونجو انہاں آزادی اظہار رائے دا مسئلہ بݨایا ہوئے تاں کیا اساں ٻئے یورپی ملک نال وی ایجھا رد عمل کریسوں۔ وزیراعظم آکھیا پنڄاہ توں ودھ مسلمان ملکاں اچ کتھائیں وی ایجھے مظاہرے کائنی تھیے۔ انہاں آکھیا جو فرانس دے سفیر کوں واپس بھیجݨ نال انہاں کوں کوئی فرق کائنا پوسی پر اساکوں فرق پمسی۔