اسلام آباد۔30اپریل(اے پی پی)پاکستان سمیت دنیا بھر دے کئی ملکیں اچ کُھسے کوں بہوں پسند کیتا ویندے۔ پنجاب، سندھ، بلوچستان اتے وسیب اچ مختلف قسماں دے کھسے تیار کیتے ویندن ،سرائیکی وسیب دے علاقیاں اچ اڄ وی کھسے دے بغیر عید دی شاپنگ ادھوری سمجھی ویندی اے خاص طور تے اساڈے وڈے بزرگ لازمی پسند کریندن۔ اے ڳالھ ماہر کھسہ ساز مہر اسد اے پی پی نال گالھ مہاڑ کریندے آکھی۔ انہاں آکھیا جو اج کل مرداں دی نسبت تریمتیں، بالاں اچوی کھسے دی پسندیدگی ودھ ڈیکھݨڑ کوں ملدی اے۔ تلے دار کھسے اچ تلے دی سوہنڑی کڑھائی کیتی ویندی اے۔ ایندے علاؤہ مختلف رنگاں دے نگ، موتی یا ول سنہری یا گولڈن رنگ دیاں باریک تاراں نال ڈیزائن بنݨائے ویندن ، ہر اک کھسہ ڈوجھے توں وکھرا ہوندا اے تے ہر عمر دے لوک آپݨی پسند تے مزاج نال رلدا ڈیزائن چنݨدن ۔ کوئی سادہ کھسہ پسند کریندے تاں کوئی نوک دار ایویں ای بغیر نوک دے کھسے مخصوص طبقہ اچ وی فرمائش تے بنڑوایا ویندا اے ۔ مہر اسد گالھ کو ودیندھے ڈسایا جو محمد اسلم علوی میڈا کلاس فیلو اے اساں پہلی توں ڈاہویں تئیں کٹھے پڑھدے رہ گیسے ۔میڈے دوست دی کھسے دی دکان اے تے ہر سال عید دے موقع تے انھاں دی دکان تے حاضری ڈیندا تے ہر واری میڈا دوست گلہ کریندے جو میکوں صرف ہک مہینے دا وقت ڈیندا تاں اسپشل ڈیزائن دا کھسہ تحفے اچ ڈیواں ہا ۔ محمد اسلم علوی خود کھسے دا ماہر اے اتے اے اوندے وڈکیاں دا پیشہ اے جیڑھا کئی پیڑھیاں توں کھسے تیار کریندن تے ہنڑ تاں مشینی کھسے تیار شدہ وچیندن ہاں جے خاص ڈیزائن بنڑاونڑ دا آڈر ملے تاں او تیار کرڈیندن ۔ انھاں ڈسایا جوہک ویلھا ہا جڈنڑ کھسہ سازی نال ہک گھریلو دستکاری دی صنعت جڑی ہوندی ہئی انھاندے بزرگ چمڑے دی رنگائی اتے کٹائی دے بعد کھسہ دی کڑھائی کیتے ہنر مند ماہر تریمتیں دے گھراں اچ مکمل میٹریل بھجیندے ہن جیڑھا تیاری دے بعد واپس ملنڑ تے کاریگر سلائی دا کم کریندے ہن تے ونج تے کھسہ تیار تھیوے ہا۔ محمد اسلم علوی اے پی پی کوں ڈسایا جوبنا مشینی کم دے بغیر ، ہتھاں نال بنڑائے ونجنڑ آلے سے بنائے ونجنڑ آلے کھسے کوں تیار کرنڑ اچ 10 توں 12ڈینھ لگدن جڈاں جو خاص ڈیزائن والے کھسے تے ڈوں ڈوں مہینے لگدن ۔ محمد اسلم علوی بیا ڈسایا جو پرنے دے موسم اچ سیل ودھ ویندی اے جڈاں جو عید دے موقع تے لوک پہلے توں ای آپدی اپنی پسند دے کھسے دی تیاری دا آرڈر ڈے ڈیندن ۔ کھسہ چنگی کوالٹی دے چمڑے، ریگزین، مخصوص کپڑے دے ذریعے تیار کیتا ویندا اے جیندے اچ کاریگراں دے ہتھاں دا سوہنڑاں کم نظردے۔انھاں دا آکھنڑ ہا جو مختلف برانڈز اتے بدلدے بدلتے فیشن نال کھسے دی مانگ تے مقبولیت اچ کوئی فرق نی پوندا۔
