اسلام آباد۔10مئی(اے پی پی)وزیرِاعظم عمران خان آکھیے جو حکومت نجی شعبے کوں ترقیاتی عمل اچ رلاوݨ اتے انہاں کوں مناسب سہولتاں ݙیوݨ کیتے پرعزم اے، بیرون اتے اندرون ملک سرمایہ کاراں کوں سوکھ ݙیوݨ کیتے سرمایہ کاری بورڈ کوں فعال کیتا ویندا پئے۔ اے ڳالھ انہاں اسلام آباد اچ اپݨے زیر صدارت اجلاس اچ کیتی جیندے اچ پبلک سیکٹر ڈویلپمنٹ پروگرام دے تحت مختلف ترقیاتی منصوبیاں خصوصاً نجی شعبے دی شراکت نال مکمل تھیوݨ آلے منصوبیاں تے بریفنگ ݙتی ڳئی۔ اجلاس اچ وزیرِ منصوبہ بندی اسد عمر، وزیرِ خزانہ شوکت ترین، متعلقہ وزارتاں دے سیکرٹریز اتے سینئر افسران شریک ہن۔ وزیرِ اعلیٰ پنجاب سردار عثمان بزدار اتے صوبائی وزیر خزانہ ہاشم جوان بخت و صوبائی حکام وی ویڈیو لنک تے اجلاس اچ موجود ہن۔ ݙسایا ڳئے جو وزیرِ اعظم دے ویژن دے تحت ترقیاتی عمل اچ پبلک پرائیویٹ پارٹنرشپ ماڈل سانڳے تقریبا ً 50 منصوبیاں تے کم مکݨ آلا اے ڄݙاں جو 1016 ارب مالیت دے 18 منصوبے مالی سال 2021-22 اچ ݙتے ویسن، سیالکوٹ کھاریاں موٹر وے منصوبے دا ٹینڈر جاری کر ݙتا ڳئے اتے سکھر حیدرآباد موٹر وے منصوبے دا ٹینڈر جون اچ جاری تھیسی۔ وزیرِ اعظم عمران خان پنجاب اتے خیبرپختونخواہ دی صوبائی حکومتاں کوں ہدایت کیتی جو فیڈرل اتے صوبائی ترقیاتی منصوبیاں تے عمل درآمد دی پیش رفت رپورٹ، مستقبل دے ترقیاتی منصوبیاں دے نال نال علاقائی سطح تے ترقیاتی منصوبیاں دی ونڈ اتے انہاں تے پیشرفت دی رپورٹ پیش کیتی ونڄے۔
