اسلام آباد۔29جون(اے پی پی)قومی اسمبلی آندے مالی سال 22-2021 کیتے 8487 ارب روپے دا وفاقی بجٹ منظور کیتے جیندے اچ محصولات دا ہدف5829 ارب روپے رکگیا ڳئے۔ 3400 ارب توں ودھ دا خسارہ ٹیکس اصلاحات و اندرونی و بیرونی معاونت اتے کفایت شعاری نال پورا کیتا ویسی۔ حکومت ولوں کھیر اتے کھاوݨ پیوݨ دیان شئیں تے سیلزٹیکس نہ ہوسی، انٹرنیٹ اتے موبائل فونز تے وی ٹیکس دی تجویز ولا ڳھدی اے، سرکاری ملازمین دی تنخواہاں اتے پنشن اچ 10 فیصد ایڈہاک ریلیف ݙتا ڳئے، سرکاری شعبہ دے ترقیاتی بجٹ دا حجم 900 ارب روپے اے، ڳھٹو ڳھٹ 20 ہزار روپے ماہوار ہوسی، وفاقی ٹیکساں اچ صوبیاں دا حصہ پچھلے سال دے 2704 ارب روپے توں ودھ تے 3411 ارب روپے رہسی، بنیادی محصولات دا حجم 7909 ارب روپے رکھݨ دی تجویز اے جیڑھی پچھلے سال دے نظرثانی شدہ 6395 ارب روپے دے مقابلے اچ 24 فیصد ودھ اے، نان ٹیکس ریونیو اچ 22 فیصد ودھارا کیتا ڳئے، مجموعی سبسڈیز دا تخمینہ 682 ارب روپے لایا ڳئے۔ احساس پروگرام کیتے 260 ارب روپے رکھین۔ شرح نمو دا ہدف 4.8 فیصد رکھیے، مقامی سطح تے ٻݨݨ آلیاں 1000 سی سی تئیں دیاں ڳاݙیاں تے فیڈرل ایکسائز ڈیوٹی اچ چھوٹ اتے سیلز ٹیکس 17 فیصد توں ڳھٹا تے 12.5 فیصد کر ݙتے، ایندے تے ویلیو ایڈڈ ٹیکس وی مکا ݙتے۔ نویں مالی سال دے وفاقی بجٹ اچ 1.1 ارب ڈالر دی ویکسین منڳواوݨ اتے جون 2022ء تئیں 10 کروڑ لوکاں کوں ویکسین لاوں دا ہدف رکھیے، آندے سال کیتے معاشی ترقی دا ہدف 4.8 فیصد رکھیے۔ وفاقی میزانیہ اچ “کامیاب پاکستان پروگرام” دے تحت ڳھٹ آمدن ہائوسنگ دی مد اچ 20 لکھ روپے تئیں سستے قرضے ݙتے ویسن، ہر گھر کوں صحت کارڈ ملسی اتے ہر گھر دے ہک ڄݨے کوں مفت تکنیکی تربیت ݙتی ویسی، ہر کاشتکار گھرانے کوں ہر فصل کیتے ݙیݙھ لکھ روپے دا سود توں پاک قرضہ ملیس، ٹریکٹر و مشینی آلات کیتے ݙو لکھ روپے دا قرض ݙتا ویسی۔ ہر شہری گھرانے کوں کاروبار کیتے پنج لکھ روپے تئیں سود توں پاک قرض ݙتا ویسی، نویں بجٹ اچ شرح نمو اچ ودھوتری، نینگراں کونر وزگار دے مواقع، صنعت، برآمدات، ہائوسنگ و تعمیرات، کمزور طبقات کیتے سماجی تحفظ دے پروگرام، توانائی دے شعبے اچ اصلاحات تے خصوصی توجہ ݙتی ڳئی اے۔
