حج دا رکن اعظم ’’وقوف عرفات‘‘ ادا، مسلمان آپݨے دل نفرت توں پاک کرن، ہک ٻئے نال نرمی نال پیش آوو، امام کعبہ دا خطبہ حج

اسلام آباد۔19جولائی(اے پی پی)عازمین حج سنوار کوں حج دا رکن اعظم ’’وقوف عرفات‘‘ ادا کیتے۔ فرزندان توحید مسجد نمرہ اچ خطبہ حج سݨیے اتے پیشیں اتے دیگر دیاں نمازاں کٹھے پڑھین۔ عازمین حج عرفات اچ قیام کیتے، سڄھ لہݨ تئیں آپݨے حج دی قبولیت و عالم اسلام دی سربلندی دیاں دعائیں منڳین۔ عازمین قرآن مجید دی تلاوت کیتی۔ عازمین بعد اچ مزدلفہ ونڄ تے مغرب اتے عشاء دیاں نمازاں وی کٹھے پڑھین اتے رات ٹکین۔ ایں توں پہلے غلاف کعبہ دی تبدیلی دی سالانہ تقریب مسجد الحرام اچ تھئی۔ خطبہ حج ݙیندے امام کعبہ امام شیخ بندر بن عبدالعزیز مسلماناں کوں آکھیے جو او آپݨے دلاں اچوں نفرت کڈھ ݙیون اتے ہک ٻئے نال پیار، محبت اتے نرمی نال ورتن۔ مسجد نمرہ میدان عرفات اچ خطبہ حج ݙیندے انہاں آکھیا جو مسلماناں کوں آپݨے والدین، ٻالآں، رشتہ داراں، تریمتیں اتے ملازماں سودھا ساریاں نال شریعت دے مطابق رحمدلی ݙکھاوݨی چاہیدی اے۔ امام کعبہ آکھیا جو او آپݨی سماجی ذمہ داریاں پوری کرن اتے زمین تے کہیں وی خرابی توں بچݨ کیتے قوانین تے عمل کرن، مسلماناں کوں آپݨے ݙے ڳھن دے معاملات اچ وی دیانتداری ݙکھاوݨی چاہیدی اے اتے کہیں کوں دھوکہ نئیں ݙیوݨا چاہیدا۔