ویلنگٹن ۔ 27 اگست (اے پی پی) نیوزی لینڈ دے شہر کرائسٹ چرچ دی مسیت النور اتے اسلامک سینٹر اچ فائرنگ کرتے 51 مسلماناں کوں قتل تے 40 توں ودھ کوں زخمی کرنڑ آلے آسٹریلوی شہری برینٹن ٹارنٹ کوں عمر قید دی سزا سنڑا ڈتی گی اے ۔او سزا دے دوران پے رول تے رہائی دی سہولت وی حاصل کائنان کرسگسی ۔ نیوزی لینڈ دی کہیں عدالت ولوں اے ہنڑ تئیں سنڑائی ونجنڑ آلی ساریں توں سخت سزا اے ۔ سفید فام نسل دی برتری تے یقین رکھنڑ آلے 29 سالہ مجرم عدالت دے روبرو اپنڑاں جرم من گھدے ۔ برینٹن ٹارنٹ تے 51 مسلماناں دے قتل، 40 دے اقدام قتل اتے دہشت گردی دے الزام لاتے گئے ہن ۔ مقدمہ دی سماعت کرنڑ آلے کرائسٹ چرچ ہائی کورٹ دے جج کیمرون مینڈر آکھیے جو مجرم کیتے کہیں معینہ مدت دی سزا ناکافی ہوسی ۔جج مزید آکھیے جو مجرم دے جرم اتنے وڈے ہن جو باقی ساری عمر جیل اچ گزارنڑ دے باوجود انہاں جرائم دی پوری سزا نہ بھگتا سگسی ۔جج ایں گال تے وی افسوس دا اظہار کیتے جو مجرم کوں آپنڑے ڈراکلے جرائم تے کوئی پچھتاوا اتے افسوس وی کائنی۔سزا سنڑائے ونجنڑ ویلھے مجرم کمرہ عدالت اچ موجود ہئی۔ اوںعدالتی فیصلے یا جج دے ریمارکس تے کہیں رد عمل دا اظہار کائنی کیتا ۔ جج مزید آکھیے جو مجرم ہک خاص کمیونٹی دے خلاف اپنڑے دل اچ کاوڑ گھن تے اساڈے ملک اچ آئے تے ایں چیز دی اساڈے ملک سودھے دنیا اچ کوئی جاہ کائنی ۔ جج مجرم توں پچھیا جو او ایں موقع تے کجھ الاونڑ چاہندے مجرم چپ رہیا ایندے توں پہلے استغاثہ عدالت کوں ڈسایا جو مجرم آپنڑے جرم دی بہوں تفصیل نال منصوبہ بندی کیتی ہئی تے او بے گناہ لوکاں کوں قتل کرنڑ دے نال لوکاں دی ہک وڈی تعداد کوں دہشت زدہ کرنڑ چاہندا ہئی ۔
