کراچی ۔ 28 ستمبر (اے پی پی)سرائیکی عوامی سنگت پاکستان ولوں سینئر رہنماءملک اکبر دا پہلا وریھنڑاں ایوب گوٹھ کراچی اچ تھئے، جیندے اچ کراچی اتے سرائیکی وسیب توں وڈی تعداد سرائیکی رہنماواں اتے دانشوراں دی شریک تھئی۔ ایں موقع اتے سرائیکی دانشور ظہور احمد دھریجہ ، سینئر صحافی تے دانشور نذیر لغاری، صدر سرائیکی عوامی سنگت مشتاق فریدی، سرائیکی عوامی تریمت تحریک دی اگوانڑ عابدہ بتول، کرن لاشاری، سعدیہ شکیل، نسرین گل(ادی نِیناں)، افصہ اکبر ملک،طاہرہ خاور، شہر بانو، انیلہ عابد، رخسانہ حمید، زبیدہ اچھا، عاصمہ ملک، ممتاز ملک، یاسمین ملک، رخسانہ عاشق، صغریٰ لغاری، سینئر صحافی سعید خاور،صحافی ارشاد امین، صحافی شاہد جتوئی،قاسم خان لاشاری، رشید جرانی خورشید انجم ، حمید علی ، زاہد عباس ، نمائندہ بول خان پور رانا نعیم، ملک ریاض تے ڈوجھیاں شرکت کیتی۔ شرکاءآکھیے جو ملک اکبر ساری حیاتی وسیب دی عوام دی خدمت کیتی، انھاں دیاں خدمات کوں ہمیشہ یاد رکھیاویسی۔ صدر سرائیکی عوامی سنگت مشتاق فریدی آکھئے جو ملک اکبر سرائیکی وسیب دا سرمایہ ہئی اتے وسیب کوں ایجھے لوکاں دی ضرورت ہے۔ انھاں آکھئے جوسرائیکی جماعتاں ولوں سرائیکی صوبے دے حصول سانگے کوٹ سبزل صادق آباد توں ملتان تئیں لانگ مارچ کامیاب تھیا ہا ہنڑ ملتان توں اسلام آباد سرائیکی صوبے کیتے لانگ مارچ کرنڑاں پوسی۔ سینئر صحافی تے دانشور نذیر لغاری آکھئے جو ملک اکبر وسیب دے مظلوم تے محکوم عوام دی توانا آواز ہن اتے زندگی بھر سرائیکی عوام دی خدمت کیتی۔ انھاں اعلان کیتا جوآندے مہینے ملک اکبر دی یاد اچ ہک عظیم الشان جلسہ خان پور ضلع رحیم یار اچ رکھیا ویسی۔ انھاں سرائیکی عوامی سنگت پاکستان اتے سرائیکی عوامی تریمیت تحریک پاکستان دے کارکنان ایں جلسےکوں کامیاب بنڑاونڑ کیتے آپدا کردار ادا کرن ایں موقع تے صحافی تے تجزیہ نگار سعید خاور آکھے جو ملک اکبر نہ صرف کراچی اچ وسیب دی مہمان نوازی کیتی جڈانجو غریب اتے بیروزگار نوجواناں کوں روزگار دی فراہمی کیتے آپداکردار وی ادا کیتا۔ دانشور سینئر صحافی ظہور دھریجہ آکھئے جو ملک اکبر عوامی سنگت دی پہچانڑہن، سرائیکی صوبے دے قیام کیتے جدوجہد تکھے کرنڑ دی ضرورت اے.۔ سینئر صحافی شاہد جتوئی آکھئے جوسرائیکی عوام خاص طور تے نینگراں کوں سرائیکی صوبے تحریک اچ ودھ چڑھ تے حصہ گھننڑا پوسی۔
