اجوکے سال ہنڑ تئیں 70لکھ لوک بھک توں مرگئن ، عالمی ادارہ خوراک

نیویارک۔14اکتوبر (اے پی پی) اقوام متحدہ دے ورلڈ فوڈ پروگرام آکھیے جو کورونا وائرس دی عالمی وبا پاروں اونکوں آندے چھی مہینے اچ خشک سالی تے قحط توں بچنڑ کیتے 6.8ارب ڈالر دی لوڑھ ہوسی۔گزریل ہفتے پروگرام کوں امن دے نوبل انعام نال نوازیا گئے ۔ اے انعام جھیڑے تے جنگ کوں ہتھیار دے طور تے استعمال تھیونڑ توں روکنڑ تے ڈتا گئے۔پروگرام آکھیے جو اینکوں آپنڑی امدادی سرگرمیاں کیتے ہنڑ تئیں 1.6اب ڈالر موصول تھئن ۔ورلڈ فوڈ پروگرام دے ڈائریکٹر ڈیوڈ بیزلے یو این فوڈ اینڈ ایگریکلچر آرگنائزیشن دے زیر اہتمام ہک کانفرنس اچ آکھیے جو قحط اتے خشک سالی توں بچنڑ کیتے انہاں کوں ودھ رقم درکار اے ۔بیزلے آکھیے جو ایں سال ہنڑ تئیں 70 لکھ لوک بھک توں مرگئن تے کورونا پاروں اے تعداد ڈبل تھی سگدی اے ۔روم اچ قائم ورلڈ فوڈ پروگرام آکھیے جو اوں تقریباً 88 ملکاں اچ 9 کروڑ 70 لکھ لوکاں دی مدد کریندا پئے تے دنیا اچ ہر نو اچوں ہک بندے کوں خوراک دی قلت دا سامنڑاں اے ۔