اسلام آباد۔15اکتوبر (اے پی پی):وزیراعظم عمران خان دی صدارت وچ قومی رابطہ کمیٹی ہاﺅسنگ ، کنسٹرکشن و ڈویلپمنٹ دا ہفتہ وار اجلاس منعقد تھیا۔ خمیس کوں وزیراعظم آفس دے میڈیا ونگ ولوں جاری بیان موجب اجلاس کوں چیئرمین ایف بی آر آن لائن رجسٹریشن سسٹم اتے آگاہی سیمینار دے حوالے نال بریفنگ ڈتی۔ اجلاس کوں ڈسایا گیا جو کراچی، لاہور اتے اسلام آباد اچ آگاہی سیمینار منعقد کیتے گن ۔ کنسٹرکشن شعبہ نال منسلک 112 لوکاں تے کمپنیاں ایف بی آر دے نال رجسٹر تھی گئن جیرھے جو123 منصوبیں تے کم کریسن ۔ چیف سیکرٹری سندھ اجلاس کوں ڈسایا جو سرمایہ کاراں کیتے ون ونڈو پورٹل کم کر یندا پئے جیں دے تحت سندھ اچ 19 منصوبیں دی منظوری ڈتی گئی اے ، 75 منصوبیں کیتے این او سی جاری کرڈتے گن ۔ منصوبیں دی نگرانی کیتے کمیٹی نوٹیفائی کرڈتی گی اے جیں اچ پرائیویٹ سیکٹر دے نمائندے وی شامل ہن۔ چیف سیکرٹری خیبرپختونخوا اجلاس کوں ڈسایا جو صوبہ اچ ہاﺅسنگ اتے کنسٹرکشن دے منصوبیں دی کل سرمایہ کاری 83 بلین روپے تئیں پج گئی اے سیمنٹ، سلھاں تے سریے دی وکامت اچ ودھارا تھئے۔ گورنر سٹیٹ بینک ڈسائے جو سوکھاں قسطاں دے حوالے نال سارے پرائیویٹ بینکاں نال مشاورت دا عمل مکمل کر گھدا گئے انہاں دے تحفظات پرے کیتے ویندے پن ۔ وزیراعظم ہدایت کیتی جو اجازت نامہ مہیا کرنڑ دے عمل کوں شفاف، آسان اتے گھٹ مدت بنڑایا ونجے تاں جو سرمایہ کار سوکھے تھیون ۔
