اسلام آباد۔16نومبر (اے پی پی سرائیکی نیوزسروس ) ادی نیناں دا آکھݨ اے جو وسیب واسیں دیں حق حقوق کیتے 100 کنوں ݙھیر سرائیکی سیاسی، ثقافتی تے ادبی جماعتاں سرگرم ہِن. سرائیکی حقوق دی جدوجہد کرݨ آلے قوم تے وسیب دا ماݨ ہن. ڳالھ کاؤڑی تاں ھے پر حقیقت ایھا اے جو سرائیکی قوم دی حالی تئیں کوئی وی اینجھی موثرآواز کائنی جیڑھی وسیب دے وسائل تے قبضے، لُٹ مار، قوم دے حق تے ݙاکے تے ناانصافیں دے خلاف ایواناں یا قبضہ گیراں کوں ہِلا ݙیوے. انتہائی معذرت نال ایں بے اوقاتی تے بے سوبھی دی وجہ اساں آپ خود ہیسے، جو اساں ݙڈھ ݙڈھ انچ دیاں مسیتاں بݨا خود بانگے، خود ملاں تے خود نمازی بݨ ڳئے ہیں . ساݙی کھینڈو کھینڈ طبعیت اساݙے اتحاد، اتفاق، ہک مٹھ تھیوݨ تے ہک متھ بݨاوݨ اچ سبھ توں وݙی رکاوٹ اے. اساں ہک لحظےکیتے آپݨیں آپݨیں جاہ ٻہہ سوچوں جو ساݙا اے عمل قوم کیتے فیدے مند اے یا زیان اچ اے، تاں سچی ڳالھ اے ھِے جو اساں ماء دھرتی نال تخت لہور توں ودھ ݙوہ کریندے پئیوں. اساݙا آپݨیں وݙکیں دی ایں ڳالھ تے پکا یقین اے جو ماء دیں ٻتریں دھاراں دا قرض لاتھیں بغیر بخشش کائنی، اساں ماء دھرتی داحق ادا کریندے پیسے یا کائنا ایں ڳالھ کوں سوچݨ تے ایندا انت کڈھݨ دی ٻہوں لوڑھ اے. اڄوکا سبھ توں وݙا سچ اے ھِے جوصادق آباد توں ٹانک تئیں سرائیکیں دے ڳڑھ 23 ضلعیں ءچ تریمتیں دی شمولیت ٻہوں ضروری اے تاں جو موثر طریقے نال اساݙی تحریک اگوں تے ٹر سگے تے اساں آپدی منزل گھنݨ اچ کامیاب تھیووں .
عاشق بزدار سئیں سچ آکھیا ہئی…
؎ ناں جے کر جاڳیوں وقت تے
تاں چَہکاں چَرسِن چور
تیݙیاں مومل، سومل، سسٌیاں
وَنڄ وِکسِن شَہر لَہور
اے پی پی نال گالھ مہاڑ اچ ادی نیناں دا بیا آکھݨ ہا جو
ماء دھرتی… اڄ اساں توں سوالی اے، جو پتہ نی کݙاں میݙے ٻچڑے اشاک تھیسن، نندروں جاڳسن، اکھیں کھولیسن، سڄاک تھی غیراں دے پیر ݙکیسن
میں ہک دھی، بھیݨ تے ماء ہووݨ پاروں اے سمجھدی آں جو سرائیکی تحریک کوں موثر بݨاوݨ تے تیز کرݨ کیتے روہی ، چولستان، تھل تے دمان دیاں تریمتیں دا شامل تھیوݨ ٻہوں ضروری اے تے ایندے کیتے سرائیکی جماعتاں دے اڳواݨ، اساݙے اگوانڑ تے بھرا ٻہوں وݙا کردار ادا سڳدن. خان پور اچ سرائیکی عوامی سنگت دے اڳواݨ ادا ملک اکبر دی یاد اچ تھیوݨ آلے تحریکی کٹھ اچ سینکڑاں بھیݨیں دی شرکت تے دھریجہ نگر ءچ سرائیکی تریمت کنونشن سرائیکی تحریک دی اڳونہی کیتے ٻہوں وݙی کامیابی اے.اساݙے بزرگ تے بھرا پٹھ بھرائی کرن، ہمت تے حوصلہ ودھاون تاں انشااللہ بھیݨیں سرائیکی تحریک اچ مورھی دستے دا کردار ادا کریسِن. دھریجہ نگر دے سرائیکی تریمت کنونشن اچ ادی ریحانہ ایوب دھریجہ، ادی زیب النساء دھریجہ، ادی رابعہ خورشید دھریجہ، ادی نازیہ شکور دھریجہ، ادی رضیہ پروین، ادی ریحانہ نسیم دھریجہ تے کنونشن ءچ شریک ٻنہائیں بھیݨیں دے جوش تے جذبے سرائیکی تحریک کوں نوٌیں طاقت ݙتی اے. خانپور تے دھریجہ نگر دیاں بھیݨیں اساݙا ماݨ ہن ، بھیݨیں دے جذبے کوں ست سلام پیش کریندی ہاں ایں امید نال جو آپدا بھرپورکردار نبھیندیاں رہسن ۔
