کراچی(اسٹاف رپورٹر )سرائیکی عوامی تریمت تحریک پاکستان دے پہلے یوم تاسیس دی تقریب کراچی اچ تھئی جیندے اچ شریک عہدیداران اتے کارکنان تریمتیں تنظیم دی پہلی سالگرہ دا کیک کٹیا. تقریب اچ سینئر صحافی نذیر لغاری، صدر سرائیکی عوامی سنگت مشتاق فریدی، کرن لاشاری، سعدیہ شکیل، ادی نیناں، افصہ ملک، رخسانہ حمید،ساجدہ پروین، یاسمین ملک، انیلہ عابد، ممتاز ملک، عاصمہ ملک، زبیدہ اچھا، رابعہ نوشین،عبدالخالق اچھا، قاسم خان لاشاری، ڈاکٹر طارق محمود،سلطان خان لاشاری، زاہد خان، عابد خان،قادر بخش لاٹکی وی موجود ہن۔ تقریب نال خدیجہ اچھا، ثناء حمید اتے رابعہ نوشین نے انقلابی نظماں پیش کیتن۔ کرن لاشاری، ساجدہ پروین، افصہ ملک، رخسانہ حمید اتے انیلہ عابد خطاب کیتا۔ چیئرپرسن سرائیکی عوامی تریمت تحریک رہبر عابدہ بتول عہدیداران کوں بہترین کارکردگی تے خراج تحسین پیش کریندے آکیا جو سرائیکی قوم دے مسائل اڳونہے کرݨ اچ تریمت تحریک فعال کردارادا کیتے، اڳو تے وی اساں اپݨا حق منڳدے راہسوں۔عابدہ بتول آکھیا جو منظم سازش دے تحت روہی چولستان اچ صدیاں توں آباد سرائیکیوں کوں بے دخل کرتے غیر مقامی لوکاں کوں زمیناں ونݙیاں وینداں پین، سرائیکی ےآام دط آسائل لٹݨ دی اجازت نہ ݙیسوں۔ سینئر صحافی نذیر لغاری سرائیکیاں دے حقوق خاص کر تریمتیں دے مسلے اڳونہے کرݨ کیتے جدوجہد دی وݙی تعریف کیتی اتے آکھیا جو ایں تحریک نال قوم اچ امید دی ݙاٹ ٻلی اے جو انشااللہ سرائیکی صوبہ بݨݨ دا ویلھا آڳئے۔ صدر سرائیکی عوامی سنگت مشتاق فریدی آکھیا جو تریمت تحریک سرائیکی تحریک اچ نواں جوش بھر ݙتے ،اڄ قوم دا ہک ہک ٻال سرائیکستان صوبہ منڳدا پئے۔ ڈاکٹر طارق محمود آکھیا جو ساݙیاں ماواں بھیݨیں دھیریں میدان عمل اچ آ ڳین،ہݨ کوئی طاقت کوئی طاقت سرائیکی قوم دے حقوق نئیں کھس سڳدی۔
