آرٹس کونسل آف پاکستان کراچی پاروں تیرھویں عالمی اردو کانفرنس ٢٠٢٠ دے ݙوجھے ݙینھ دا پنجواں سیشن ”سرائیکی تریمت، کل، اڄ تے صباحیں“دے موضوع تے تھیا

اسلام آباد ۔6دسمبر  (اے پی پی سرائیکی سروس)آرٹس کونسل آف پاکستان کراچی پاروں تیرھویں عالمی اردو کانفرنس ٢٠٢٠ دے ݙوجھے ݙینھ دا پنجواں سیشن ”سرائیکی تریمت، کل، اڄ تے صباحیں“دے موضوع تے تھیا۔ سیشن نال خطاب کریندیں ہوئیں سرائیکی تریمتاں اے عزم کیتا جو او آپݨی جدوجہد کوں ٻیا تکھا کریسن۔ ماضی اچ سرائیکی تریمتیں نال امتیازی سلوک کیتا ڳئے اتے انہاں ذہنی اتے جسمانی تشدد دا نشانہ بݨایا ڳئے پر ویلھا بدلݨ دے نال نال اڄ سرائیکی تریمت مضبوط تھیندی پئی اے اتے ایں وچ اتنا شعور آڳئے جو او آپݨے حقوق سنڄاݨ سڳن۔ آپݨے حقوق گھنݨ سانڳے اساݙی جدوجہد جاری رہسی۔ ریبر سرائیکی عوامی تریمت تحریک عابدہ بتول، کرن لاشاری،سعدیہ شکیل اتے نسرین گل(ادی نیناں)کیتا جݙانجو نظامت ساجدہ پروین کیتی۔ ایں موقع تے صدر آرٹس کونسل محمد احمد شاہ ،نذیرلغاری، ڈاکٹر یوسف اتے ٻنہاں کوں سرائیکی اجرک وی پیش کیتی ڳئی ۔ اجلاس نال خطاب کریندیں ہوئیں رہبر سرائیکی عوامی تریمت تحریک پاکستان عابدہ بتول آکھیا جو ماضی اچ سرائیکی تریمت دی حیثیت نہ ہووݨ دے برابر ہئی اوندی حیثیت ہک غلام وانڳوں ہئی جئیں کنے کوئی اختیار کائنا ہئی۔ انہاں آکھیا جو ادھ صدی پہلے تئیں سرائیکی تریمت غلامانہ، جاگیردارانہ،قبائلی اتے سکھا شاہی نظاماں دا شکار ہئی پر اڄ ویلھے دے نال نال جینویں ٻنہاں لوکاں ترقی کیتی اے اونویں سرائیکی تریمت وی ترقی کریندی پئی اے۔انہاں آکھیا جو سرائیکی تریمت کوں ماضی اچ انسان دا درجہ کائنا ݙتا ویندا ہئی پر اڄ ویلھا اتے حالات بدل ڳئن۔ ہݨ سرائیکی تریمت تعلیم گھنݨ سانڳے کوشاں اے اتے ایں کم اچ اوندے ٹٻر دے لوک جیڑھے ماضی اچ رکاوٹ بݨدے ہن او وی مدد کریندے پئن اتے چاہندن جو سرائیکی تریمت وی پڑھے لکھے اتے تعلیم ڳھن کراہیں اڳوں آوے اتے آُپݨے ٹٻر دا ناں روشن کرے۔