اسلام آباد۔7دسمبر(اے پی پی سرائیکی سروس) سرائیکی دے معروف شاعر رفعت عباس دا ناول ”لوݨ دا جیوݨ گھر” چھپ ڳئے ۔ڈاکٹر خالد اقبال اے پی پی نال گالھ مہاڑ کریندے آکھے جو سرائیکی وسیب دے نامور شاعر، رفعت عباس دا ناول ”لوݨ دا جیوݨ گھر” ہک ایجھے ویلے چھپ تے آئے جیڑھلے سرائیکی شاعری اتے نثری صنف ناول تے بہار دا موسم اے۔ انھاں دا اے ناول کئی جہتاں تےمحیط اے۔ ناول ”لوݨ دا جیوݨ گھر” ٹائم اینڈ سپیس (Time and Space)قدیم شہر ملتان اتے جڳ جہان، کئی زمانیاں دا بیانیہ اے۔ جیندے اچ تریخ دا بہائو، دیو مالا اتےخواب دے توسط نال عام بندے دا قصہ بیان کیتا گیا اے۔ ناول اچ مقامی کردار ”لوݨکا” سارنگ، شوبھا، درشے، رتڑی، نِسرا،سادھا جاگی، سگرایا، دادرا، دھارا، نارنگی، جائل، انبا ،چندر جایا، چندر جائی، مقامی وسوں دے کردار ہن ۔ ݙو انگریز کیپٹن اولیوررابرٹس، لیفٹیننٹ جیمز کیلے، حملہ آوراوں دے نمائندہ کردار ہن۔انھاں دا ٻیا آکھݨ ہا جو ناول دا ہر باب ہک ایجھا دَر اے جیندے نال ویلا کئی زمانیاں دا پندھ کریندا ہوئیالنھگدا اے ۔ ناول اچ کل سولھاں در ہن ۔ ہر در دا منڈھ ناول دی ڈائری، یاداشتاں ، سوانحی حالات دی کنجی اے جتھوں ناول نگار ویلھے اتے جاء (ملتان) سن1918ئ، 1919ئ، 1920ء دا زمانہ آپدی مُٹھی اچ مہارت نال قابو کر رکھا اے۔ ناول نگار کامیاب تکنیکی مہارت نال ناول کوں کئی زمانیاں تئیں کھنڈا ڈتا اے۔ ناول دی کہانی لوݨی شہر دے کردار لوݨکا دی گمشدگی اتے اوندی تلاش توں شروع تھیندی اے تے اوندے بعد قاری ناول دی گرفت اچ گم تھی ویندے ۔ اے شاہکار ناول سرائیکی نثر دا سوہݨا اسلوب اے جیندی قرأت اچ ریشم سویں ملائمت اتےروانی اے۔ خالص سرائیکی زبان دے الفاظ دا ورتارا شاندار اے۔ زبان تے بیان دا اظہار قاری کوں آپدے جادو اچ ولہیٹ گھندا ۔ ناول دیاں خوبیاں اچ ہک اہم ڳالھ دستاویزی شہادتاں ہن ، جیکوں ڈاکو ڈرامائی، سیچیوشنل صورت حال دا غماز آکھیا ونڄ سگیندا اے۔ اے ناول جنگ کوں روکݨ اتے ناٹک ، آرٹ دی رمز دے توسط نال قوماں ، تہذیباں وچال اَمن دا سنہیا اے۔ اے ناول کئی جہتاں اتے وسعتاں دا حامل اے۔ ڈاکٹر خالد اقبال آکھے جو میں بے مثل شاعر رفعت عباس کوں کامیاب ناول ”لوݨ دا جیوݨ گھر” لکھݨ تے مبارک باد ݙینداں ۔ میݙا اے گمان اے جو آوݨ آلے زمانیاں اچ ایں وݙے ناول تے ہک فلم بنڑائی ونج سگیندی اے ۔
