اسلام آباد۔13جنوری(اے پی پی) پاکستان اتے ترکی بین الاقوامی سطح تے آپسی دلچسپی دے معاملیاں تے سانجھے لائحہ عمل بݨاوݨ تے اتفاق کیتے۔ ترجمان دفتر خارجہ دے مطابق وزیر خارجہ مخدوم شاہ محمود قریشی نال انہاں دے ترک ہم منصب مولود چاوش اولو بدھ کوں وزارت خارجہ اچ ملاقات کیتی۔ ملاقات اچ ݙو پاسہ تعلقات، اہم علاقائی تے عالمی مسئلیاں سودھے آپسی دلچپسی دے معاملیاں تے ڳالھ مہاڑ کیتی ڳئی۔ ݙوہیں وزرائے خارجہ پاکستان اتے ترکی وچال ݙو پاسہ تعقلقات تے اطمینان کیتا اتے اعلیٰ سطحی اسٹریٹیجک کوآپریشن کونسل دے اسلام آباد اچ تھیوݨ آلے اجلاس اچ کیتے ڳئے فیصلیاں تے جلدی عملدرآمد کوں یقینی بݨاوݨ تے اتفاق کیتا۔ وزیر خارجہ ترک ہم منصب کوں بھارتی قابض فوج ولوں مقبوضہ جموں تے کشمیر اچ جاری انسانی حقوق دی سنگین خلاف ورزیاں اتے خطے کوں درپیش خطریاں بارے ݙسیا۔ وزیرخارجہ کشمیر دے مسئلے بارے ترکی دی حمایت تے ترک وزیرخارجہ دا شکریہ ادا کیتا۔
