مظفرگڑھ ۔16مارچ (اے پی پی):مظفرگڑھ اچ گزریل 48 گھنٹے اچ مبینہ طور تے پنج ٻالاں دے نال زیادتی دے واقعات،شاہجمال اچ 13 سال دے ٻال کوں قتل کرتے لاش کوں درخت نال لٹکا ݙتا ڳیا ،آئی جی پنجاب رپورٹ منگ ڳھدی اے ۔تفصیل موجب پہلا واقعہ تھاݨہ خانگڑہ دے علاقے اچ پیش آیا ٻالڑی دے والد ارشد دے مطابق ایندی 8 سالہ دھی نیڑے ہوٹل توں روٹیاں گھنݨ ڳئی تے دیر تئیں واپس نہ آئی ۔ اوندا پتہ کیتا تاں ݙسایا ڳیا جو ملزم محمد ارسلان ٻالڑی کوں موٹرسائیکل تے ٻلہا تے گھن ڳئے ملزم دے گھر پڄݨ تے گھروں ٻالڑی دے رووݨ دی آواز آندی پئی ہئی تے ملزم بدفعلی اچ مصروف ہئی انہاں دے آوݨ تے اتھوں بھڄ ڳیا ، ݙوجھے واقعے اچ تھاݨہ چوک سرور شہید پولیس دے مطابق امام مسیت ملزم حافظ اللہ نواز 10 سالہ یتیم ٻال مزمل حسین جیڑھا جو پڑھݨ کیتے آندا ہئی اوندے نال زبردستی بدفعلی کیتی پولیس تھاݨہ چوک سرور شہید متاثرہ ٻال دے چاچے غلام عباس دی مدعیت اچ مقدمہ درج کرڳھدے تریجھا واقعہ مظفرگڑ ھ دے نیڑے علاقہ چوک بصیرہ اچ پیش آیا جتھاں کوڑا نامی اوباش 5 سالہ ٻال کامران کوں جھاڑیاں گھن تے زیادتی دا نشانہ بݨایا، چوتھا واقعہ مظفرگڑھ دے نیڑے علاقہ قصبہ گجرات اچ 5 مرلہ اسکیم پیش آیا جتھاں چوتھی کلاس دے طالب علم عبداللہ کوں ہمسایا عثمان شیخ پتنگ بݨا تے ݙیوݨ دی بہانہ کرتے زیادتی دا نشانہ بݨایا پولیس متاثرہ ٻال دے والد سرور دی مدعیت اچ مقدمہ درج کر تے قانونی کاروائی شروع کر ݙتی زیادتی دا پنجواں واقعہ مظفرگڑھ دے قصبہ شاہجمال اچ پیش آیا جتھاں مدرسہ دے 13 سالہ طالبعلم دے نال مبینہ طور تے زیادتی دے بعد قتل کوں خودکشی دا رنگ ݙیوݨ کیتے لاش کوں درخت نال لٹکا ݙتا ڳیا ٻال دے والد موجب ٻال کھل کراہیں پڑھݨ کیتے ویندا ہئی خودکشی دا سوال ہی پیدا نی تھیندا پولیس سارے واقعات دے مقدمات درج کرتے قانونی کاروائی شروع کر ݙتی ،سول سوسائٹی دے ارکان اتے شہریاں ٻالاں نال زیادتی دے ودھدے واقعات تے تشویش دا اظہار کریندے ہوئیں حکومت توں نوٹس گھنݨ دا مطالبہ کیتے ۔
