پاکستان سرائیکی پارٹی دے بانی بیرسٹر م تاج محمد خاں لنگاہ دا8 واں ورھیݨاں تے پارٹی دا 32 واں یوم تاسیس منایا ڳیا

اسلام آباد۔11اپریل (اے پی پی):جلالپور پیر والہ اچ پاکستان سرائیکی پارٹی دے بانی بیرسٹر م تاج محمد خاں لنگاہ دا8 واں ورھیݨاں تے پارٹی دے 32 ویں یوم تاسیس دے موقع تے کوٹلہ چاکر اچ پی ایس پی جلالپور پیر والہ دے زیر اہتمام تاج لنگاہ کچاری منعقد تھئی جیں اچ پارٹی دی چیئرپرسن ڈاکٹر نخبہ تاج لنگاہ، مرکزی صدر ملک اللہ نواز وینس، مرکزی رہنماء ڈاکٹر مقصود لنگاہ۔سیکرٹری جنرل اکبر انصاری ایڈووکیٹ، سرائیکی شاعر جہانگیر مخلص، ترجمان پی ایس پی ملک جاوید چنڑ ایڈووکیٹ، ملک اکرم گھلو، ملک وارث موتھا، سابق تحصیل ناظم سردار ارشاد عباس گھلو، شبیر احمد لکھیسر، غلام عباس ڈاہا، ملک شوکت جٹ، مولانا خورشید احمد طاہر سعیدی، محمد ندیم جھلݨ، ڈاکٹر عمر فاروق سیال، قاسم مشتاقِ موتھا، ڈاکٹر بلال سعید آرائیں، ملک وقاص گھلو دے علاوہ پارٹی کارکنان اتے معزز سیاسی وسماجی شخصیات شرکت کیتی جݙاں جو میزبانی دے فرائض پاکستان سرائیکی پارٹی یوتھ ونگ دے رہنماء محمد صابر خاں گھلو انجام ݙتے تاج لنگاہ کچاری اچ مقامی شعراء کرام اتے صدارتی ایوارڈ یافتہ شاعر جہانگیر مخلص سرائیکی محرومیاں اتے وسیب دے منافق اتے طوطہ چشم سیاست داناں دے سرائیکی وسیب نال مذاق تے نظماں پیش کیتیاں ۔ڈاکٹر نخبہ تاج لنگاہ، ملک اللہ نواز وینس، ڈاکٹر مقصود خاں لنگاہ، سیکرٹری جنرل اکبر انصاری ایڈووکیٹ اتے ملک جاوید چنڑ ایڈووکیٹ بیرسٹر تاج محمد خاں لنگاہ دے سیاسی سرائیکی قومی تحریک اتے پارٹی کیتے خدمات تے زبردست خراج عقیدت پیش کیتا ۔مقررین آکھیے جو تاج لنگاہ ھک تاریخ ساز شخصیت ہن انہاں ہمیشہ سرائیکی وسیب دے پسے ہوئے طبقیں دی ترجمانی کیتی اتے سرائیکی قوم دے آئینی حقوق کیتے اوں ویلھے دے حکمراناں تے سیاسی دباؤ پاتا جیں دے نتیجے اچ پیپلز پارٹی صوبے دے قیام دا ٻل سینیٹ توں پاس کرایا تاج لنگاہ سرائیکی قوم دے مطالبے کوں دنیا دے ہرفورم تے چاتا مگر زندگی انہاں کوں مہلت نہ ݙتی اتے 7 اپریل کوں جݙاں پارٹی دا یوم تاسیس تھیوݨاں ہئی او ݙینھ تاج لنگاہ صاحب سرائیکی قوم کوں بے یارو مددگار چھوڑ ڳئے ۔مقررین ایں ازم دا اعادہ کیتا جو تاج لنگاہ دے سیاسی مشن کوں اڳوں تے ودھایا ویسی اتے پاکستان سرائیکی پارٹی اوں ویلھے تئیں سیاسی جدوجہد جاری رکھیسی ۔