اسلام آباد ۔ 17 اپریل (اے پی پی) سفارتکاراں، تجزیہ کاراں تےمذہبی رہنماواں آکھئے جو خارجہ پالیسی دی تشکیل تے اوندے تے عمل درآمد حکومت دا کم اے اتے عوام دا کوئی گروہ حکومت تے آپدی رائے تھپیندے ہوئے اینکوں ڈکٹیت نی کرسگدا ، علماءکرام، سیاست داناں، دانشوراں اتے انسانی حقوق دے سرگرم کارکناں سمیت مختلف شعبیاں توں تعلق رکھݨ آلیاں شخصیات تحریک لبیک پاکستان دے کارکناں دے پرتشدد مظاہریاں دی بھرپور مذمت کریندے ہوئے آکھے جو ایجھے کہیں گروہ کوں معاشرے اچ مذہبی منافرت پھیلاوݨ اتے پر تشدد کارروائیاں دی اجازت نی ڈتی ونجنڑی چاہیدی ۔انھاں حکومت تے زور ڈتے جو ریاست دی عمل داری کوں یقینی بنڑاوݨ کیتے شرپسنداں دے خلاف سخت کارروائی کیتی ونجے ۔ واضح رہوے جو حکومت انتہا پسندی، عدم برداشت اتے تشدد دے رویئے دی حوصلہ شکنی کیتے تحریک لبیک تے پابندی لاڈتی اے ہے اتے ایں بارے باقاعدہ نوٹیفکیشن وی جاری کر ڈتا گیا اے۔ اے اقدام تحریک لبیک دے سربراہ علامہ سعد رضوی دی حراست دے بعد ایندے کارکناں دے پرتشدد مظاہریاں دے جواب اچ چاتا گیا۔ تحریک لبیک دے کارکناں سڑکاں تے وڈیاں شاہراواں کوں بند کیتا ، سرکاری تے نجی املاک کوں نقصان پچایا ، پولیس اہلکاراں تےحملے کیتے جیندے ننتیجے اچ قیمتی جاناں دا زیان تھئے ضیاع ہوا اتے سینکڑاں بندے زخمی تھئین ۔ سابق سفیر آصف درانی ”اے پی پی“ نال گالھ مہاڑ اچ آکھئے جو خارجہ پالیسی دی تشکیل تے اوندے تے عمل کراونڑ حکومت دی ذمے واری اے، کوئی سیاسی یا مذہبی گروپ کہیں معاملے اچ حکومت کوں آپدی رائے تاں ڈے سگدن پر او اونکوں ڈکٹیٹ نی کرسگدا ۔انھاں آکھے جو تحریک لبیک دا فرانسیسی سفیر کوں آپدے ملک واپس بھیجنڑ دا مطالبہ سفارتی اتے سیاسی لحاظ نال مناسب کائینی ۔ سابق سفیرآکھے جو ایجھے کہیں گروپ کوں خارجہ پالیسی دے معاملات تے معاشرے اچ مذہبی منافرت پھیلاونڑ اتے تشدد دا رستہ اختیار کرنڑ دی اجازت نی ڈتی ونجنڑی چاہیدی۔ سابق سفیر ایاز وزیر آکھے جو دنیا اچ کہیں وی ایں قسم دے گروپ بین الاقوامی ایشوز تے حکومت کوں ڈکٹیت نی کریندے ۔ عالمی امور دی انجام دہی حکومت دا کم ہوندے ۔ اسلامی نظریاتی کونسل دے چیئرمین ڈاکٹر قبلہ ایاز ”اے پی پی“ نال گالھ مہاڑ اچ آکھے جو ایجھے مظاہرے جیندے اچ رستے، سڑکاں بند کیتیاں ونجن ، ایمبولینساں دا رستہ روکیا ونجے ، تشدد ہووے اتےعوام کوں نقصان پجایا ونجے ، اسلامی تعلیمات دی روح دے منافی اے۔ انھاں آکھے جو سرکاری فیصلے لوکاں دے کہیں گروپ کوں نی جڈاں جو متعلقین (ماہر حکام)کوں کرنڑے چاہیدن جیڑھے بین الاقوامی معاملات اتے ڈوطرفہ تعلقات دا ادراک رکھیندن ۔ تحریک لبیک پاکستان تے پابندی توں متعلق حکومتی فیصلے دا خیرمقدم کریندےہوئے عوامی نیشنل پارٹی (اے این پی) دے صوبائی صدر ایمل ولی خان ”اے پی پی“ نال گالھ مہاڑ اچ آکھے جو اپوزیشن اچ ہوونڑ دے باوجود اے این پی ملک دی نظریاتی سیاسی جماعت دی حیثیت نال سارے شدت پسند گروہاں دے خلاف کارروائی اتے انھاں تے پابندی لا تے قومی ایکشن پلان تے مکمل عمل درآمد کیتے حکومت دی حمایت کریندی اے ۔ انھاں بیا آکھیا جو پریشر گروپاں ولوں عوام دے جذبات نال کھیڈ تے ملک کوں بدنام کرنڑ اتے سیاسی مقاصد کیتے مذہب دا استحصال نی کیتا ونجنڑاں چاہیدا اے ۔ ساﺅتھ ایشین فری میڈیا ایسوسی ایشن (سیفما) دے سیکریٹری جنرل امتیاز عالم آکھے جو میڈا نی خیال جو مذہب تشدد، نفرت اتے شرانگیزی دی اجازت ڈیندا اے اتے جیڑھے لوک رسول اللہ صلی اللہ علیہ وسلم دے مقصد کوں حاصل کرنڑ چاہندن ، انھاں کوں حقیقت اچ آپ دی تعلیمات تے عمل کرنڑاں چاہیدا اے ۔ انھاں آکھے جو صرف گروپ تے پابندی لاونڑ ناکافی اے، سیاسی مقاصد دے دےمذہب دے استعمال کوں وی روکیا ونجنڑاں چاہئیدا اے۔ سوشل میڈیا تے وی عوام دی اکثریت سڑکاں تے تحریک لبیک دے مظاہرین دی پرتشدد کارروائیاں کوں تنقید دا نشانہ بنڑائے ۔ وفاقی وزیر چوہدری فواد حسین آپدے ٹویٹر اکاﺅنٹ تے آکھے جو برصغیر اچ اسلام درگاہواں،اولیائے کرام دی تبلیغ بزرگان دین دی محبت، اخلاص اتے انسانیت دے درس دی مضبوط بنیاداں تے بنیاد رکھی گئی اے ، انھاں آکھے جو تحریک لبیک جہیں شدت پسند گروہ اسلام دی ایں شناخت کوں بدلنڑاں چاہندن اتے تشدد تے انتہاپسندی کوں ہوا ڈیونڑاں چاہندن ۔ وفاقی وزیر آکھے جو ایجھی کوششاں کوں ناکام بنڑاونڑاں مسلمان دا فرض اے۔ انھاں بیا آکھے جوحکومت کوں بلیک میل نی کیتاونج سگدا جڈاں جو پولیس اہلکاراں دے خلاف تشدد کرنڑ آلیاں کوں انصاف دے کٹہرے اچ گھن آونڑاں چاہیدا اے ۔ ”اے پی پی“ نال گالھ مہاڑ اچ وزیراعظم دے نمائندہ خصوصی برائے مذہبی ہم آہنگی تے مشرق وسطیٰ حافظ محمد طاہر محمود اشرفی آکھے جو جمہوری معاشریاں اچ پرامن مظاہرہ عوام دا بنیادی حق ہوندا اے۔ انھاں آکھے جو کوئی وی ریاست آپدے لوکاں دے قتل، انھاں دی املاک کوں بھاء لا تے ساڑن اتے یرغمال بناونڑ دے عمل کوں برداشت نی کر سگدی ، اے نہ صرف افسوسناک جڈاں جو قابل مذمت وی اے ۔ تحریک لبیک پاکستان تے پابندی بارے انھاں آکھے جوموجودہ حالات پیش نظر حکومت ملک اتے قوم دے بہترین فیدے اچ پارٹی تے پابندی لاونڑ دا فیصلہ کیتا اے۔
