اسلام آباد۔17مئی (اے پی پی):وزیر داخلہ شیخ رشید احمد آکھیے جو حکومت شہباز شریف دا ناں ای سی ایل اچ پاݙتے ، اونواز شریف کوں واپس گھن آوݨ دی بجائےرات دے اندھارے اچ ملک توں بہر بھڄدے پئے ہن ، واحد اپوزیشن ہے جیڑھی ملک توں بھڄ تے لندن ونڄݨ چاہندی اے ، وزیراعظم عمران خان کامیاب تھیسن، ملک کوں بحران توں کڈھیسوں ،اپوزیشن جو کرݨ چاہندی اے کرگھنے ، پاک فوج منتخب جمہوری حکومت اتے ملک دے رلے کھڑی اے ۔اے ڳالھ انہاں سنوار کوں اتھاں پریس کانفرنس توں خطاب کریندے ہوئیں آکھی اے ،وزیر داخلہ آکھیے جو نیب دی سفارش تے کابینہ دی ذیلی کمیٹی جیں اچ وزارت داخلہ اتے قانون دے وزراء تے متعلقہ حکام شامل ہن انہاں شہباز شریف دا نام ایگزٹ کنٹرول لسٹ اچ پاوݨ کیتے سمری کابینہ کوں بھجوائی ہئی جیں دی کابینہ منظوری ݙتی جیں توں بعد وزارت داخلہ انہاں دا ناں ای سی ایل اچ پاوݨ دا نوٹیفکیشن جاری کرݙتے ، وزیر داخلہ ݙسایا جو شہباز شریف دے خلاف نیب دا مقدمہ نمبر 22/2020 ٹرائل تے ہے، انہاں دا مقدمہ زیر التواء اے، ست ارب روپے دے اثاثیں دا کیس اے، جے او نواز شریف وانڳوں ٻاہر چلے ویندے تاں انہاں کوں واپس گھن آوݨ اوکھا ہوندا، انہاں دے خاندان دے 5 بندے پہلے ہی مفرور تے لندن اچ رہندے پن۔
