اسلام آباد۔23مئی (اے پی پی):وفاقی وزیر خزانہ و ریونیو شوکت ترین آکھیے جو وزیراعظم عمران خان دا عوام نال وعدہ اے جو مہانگ گھٹ کریسن ،حکومت جامع اتے پائیدار اقتصادی شرح نمو دے حصول کیتے برآمدات اتے ٹیکس وصولیاں ودھاوݨ سودھے لمبے تے مختصر مدت دی منصوبہ بندی دے تحت اقدامات کریندی پئی اے ، اڄوکے مالی سال معاشی اشاریے 3.94 فیصد دی اقتصادی ترقی ظاہر کریندے پئن مگر بد قسمتی نال انہاں اعداد و شمار کوں متنازعہ بݨاوݨ کیتے دیدہ دانستہ کوششاں کیتیاں ڳئن ، جݙاں جو حکومت اقتدار اچ آئی تاں ملک دا مالیاتی خسارہ 20 ارب ڈالر توں ودھ ہئی اتے زر مبادلہ دے ذخائر ٻہوں گھٹ ہن، سخت شرائط دے باوجود مجبورا آئی ایم ایف ݙے ونڄݨا پیا ، حکومت ہائوسنگ، زراعت اتے برآمدی صنعت جیہے شعبیں تے خصوصی توجہ ݙتی جیں پاروں معاشی استحکام اتے اقتصادی ترقی تھئی ، معاشی شرح نمو دی جے ایہا رفتار جاری رہی تاں آںدے مالی سال 2022 اچ 5 فیصد اتے مالی سال 2023 تئیں 6 فیصد پلس توں ودھ دی اقتصادی شرح نمو دے حصول دی توقع اے، قومی معیشت دے 12 مختلف اتے اہم شعبیں کیتے مختصر اتے طویل مدتی حکمت عملی وضع کیتی ویندی پئی اے ۔اتوار کوں میڈیا بریفنگ اچ انہاں آکھیے جو اڄوکے مالی سال 21-2020 دے معاشی اعدادوشمار دے مطابق جاری مالی سال دے دوران پاکستان دی اقتصادی شرح نمو 3.94 فیصد ودھی اے لیکن اینکوں متنازعہ بݨاوݨ دی ناکام کوشش کیتی ڳئی جݙاں جو حقائق ایندے برعکس ہن کیوں جو ادارہ شماریات منصوبہ بندی کمیشن دے تحت کم کریندا پئے تے اے اعدادوشمار پلاننگ کمیشن دے ہن وزارت خزانہ دے کائنی ۔ زوم تے ملک دی معاشی صورتحال اتے ایں حوالے نال حاصل تھیوݨ آلیاں کامیابیاں بارے ڳال کریندے ہوئیں وفاقی وزیر خزانہ آکھیے جو جݙاں وزیر اعظم عمران خان حکومت سنبھالی تاں کرنٹ اکاؤنٹ خسارہ 20 ارب ڈالر توں وی ودھ ہئی ۔
