اوٹاوا۔8جون (اے پی پی):کینیڈا دے جنوبی صوبہ اونٹاریواچ مذہبی تعصب اتے نفرت انگیزی اچ مبتلا ٹرک ڈرائیور منظم حملے دے منصوبے دے تحت مسلمان خاندان دے 4 لوکاں کوں داپھ ݙتے۔ پولیس ملزم کوں گرفتار کرڳھدے ۔ فرانسیسی خبر رساں ادارے موجب ڈیٹیکٹو سپرنٹنڈنٹ پائول ویٹ ھک نیوز کانفرنس دے دوران ݙسائے جو اے حملہ کاوڑ پاروں ھک منظم منصوبے اتے سوچی سمجھی سازش دا نتیجہ اے اتے انہاں تے حملہ ایں سانگے کیتاڳئے جو کیوں جو او مسلمان ہن ۔ انہاں آکھیے جو پولیس 20 سالہ مشتبہ ملزم نتھینیئل ویلٹ مین کوں صوبہ اونٹاریو دے شہر لندن توں 7 کلومیٹر دی حدود اچ واقع ھک شاپنگ مال توں گرفتار کرڳھدے ۔ لندن دے میئر ایڈ ہولڈر ݙسایا جو جاں بحق لوکاں اچ 74 سالہ عمر رسیدہ ما، 46 سالہ فزیوتھراپسٹ پتر، 44 سالہ نہوں اتے 15 سالہ پوتری شامل ہن جݙاں جو 9 سال دا پوترا شدید زخمی تھیا جیڑھے جو ہݨ ٹھیک اے ۔ میئر آکھیے جو ملزم کاوڑ پاروں مسلماناں اتے لندن دے شہریاں دے خلاف قتل دا منظم اتے سوچیا سمجھیا منصوبہ بݨائے ۔ کینیڈا دے وزیراعظم جسٹن ٹروڈو آکھیے جو اونٹاریو واقعہ انہاں کوں ہلا تے رکھ ݙتے ، کینیڈا اچ اسلاموفوبیا کیتے کوئی جاہ کائنی ، ایں نفرت کوں مکاوݨا ہوسی انہاں آکھیے جو پورے ملک دی مسلم کمیونٹی جاݨدی اے جو اساں انہاں دے رلے کھڑوں ۔
