اسلام آباد۔25جون(اے پی پی)وزیراعظم عمران خان آکھیے جو پاکستان امریکہ نال مہذب تعلقات رکھݨ چاہندے، نائن الیون دے بعد ساݙا تعلق یکطرفہ ہئی، امریکا چاہندا ہا جو پاکستان امداد دے بدلے ایندی ہر ڳالھ منے، افغانستان نال امریکی انخلاء دی تاریخ دا اعلان تھیندے ہی ساݙا طالبان تے اثر و رسوخ ڳھٹ ڳئے، جیکر طالبان طاقت دا رستی چنݨیا تاں خانہ جنگی تھی سڳدی اے جیندے توں اساں ٻہوں متاثر تھیسوں، مسئلہ کشمیر حل تھیوݨ تئیں بھارت نال تعلقات بحال نئیں تھی سڳدے، جیکر بھارت کشمیر اچ اپݨے غیر قانونی اقدامات ولا ڳھنے تاں کڄھ سوچیا ونڄ سڳدے۔ اے ڳالھ انہاں امریکی اخبار ”نیویارک ٹائمز” کوں انٹرویو ݙیندے آکھی۔ انہاں آکھیا جو پاکستان دا اپݨے ہمسایہ ملک بھارت دے مقابلے اچ امریکہ توں ودھ تعلق رہے، ہݨ ڄݙاں امریکا افغانستان توں ولدا پئے تاں اساں چاہندے ہیں جو امریکا نال پاکستان ساݙا ہک مہذب تعلق ہووے، تجارتی تعلقات تکڑے تھیون، امریکا نال تعلق صرف برابری دی بنیاد تے ہووݨا چاہیدے،پہلے دہشتگردی دے خلاف جنگ اچ پاکستان کوں امریکا دی ڳالھ من تے ٻہوں نقصان ٻھڳتݨا پئے اتے 70 ہزار جاناں قربان کیتن، ایندا ملکی معیشت کوں 150 ارب ڈالر دا نقصان وی تھئے، ول وی ݙوہاں ملکاں وچال اعتماد کائنا ہا، ݙوہیں ہک ٻئے کوں ݙوہ ݙیندن۔ وزیراعظم آکھیا جو میں اے کݙاھیں نئیں سوچیا جو پاکستان دا امریکا نال تزویراتی یا کوئی فوجی تعلق ہووݨا چاہیدے، ریاستاں اچ تعلق مشترکہ مفادات اتے برابری دا ہوندے، جیکر بھارت نال وی تعلقات چنڳے تھی ڳئے تاں پاکستان اقتصادی لحاظ نال مستقبل اچ اہم تزویراتی ڄاہ ہوسی، پاکستان دے امریکا نال عسکری تعلقات افغانستان توں امریکی انخلاء توں پہلے آلے ہووݨے چاہیدن۔ انہاں آکھیا جو امریکی انخلا دے انخلا توں بعد طالبان نال اثر رسوخ ڳھٹدا ویندے،پاکستان چاہسی جو طالبان تشدد دی راہ تے نہ ٹرن، جیکر انہاں طاقت استعمال کیتی تاں وݙی جنگ چھڑ ویسی، ایندے نال پاکستان دا وݙا نقصان تھیسی، ولا افغان پناہ گزین آسن۔ وزیراعظم آکھیے جو اساں اپݨی معیشت تکڑی کرݨ چاہندے ہیں، ایندے کیتے اساں افغانستان دے رستے وسط ایشیا تئیں تجارت ودھاوݨی اے بھل افغانستان اچ ولا خانہ جنگی نال سب کڄھ برباد تھی ویسی،پاکستان افغانستان اچ امن کیتے طالبان دے خلاف فوجی طاقت استعمال کرݨ دے سوا پورا ہتھ ونݙیسی، میں آپ فوجی کارروائی دا ٻہوں مخالف ہاں۔ انہاں آکھیا جیکر افغان طالبان افغانستان تے قبضہ دی کوشش کیتی تاں اساں اپݨی سرحد سیل کر ݙیسوں، پاکستان صرف افغان عوام دی چݨی ہوئی حکومت کوں ہی منیسی۔ وزیر اعظم آکھیا جو میں مودی کوں غربت مکاوݨ اتے معاشی ترقی کیتے تکڑے تجارتی تعلقات ودھاوݨ دی دعوت ݙتی ہئی بھل ایندا کڄھ نتیجہ نئیں نکلیا،جیکر بھارت اچ کوئی ٻئی قیادت ہوندی تاں اے مسلہ کݙاں دا حل تھی ڳیا ہووے ہا، جے تئیں بھارت نال جھیڑا راہسی اتے مسلہ کمشیر باقی ہوسی پاک بھارت تعلقات سدھر نئیں سڳدے۔ وزیراعظم آکھیا جو حیرانی دی ڳالھ اے جو چین اتے امریکا ہک ٻئے دے دشمن کیوں ٻݨسن، جیکر اے ݙو وݙیاں طاقتاں آپسی تجارت ودھاون تاں ایندا پورے ڄڳ کوں فیدہ تھیسی، ساکوں چین اتے امریکا ݙوہائیں نال تعلقات رکھݨݨ، چین ساݙا ہر ویلھے دا سنڳتی اتے ہمسایہ ملک اے۔
