پشاور۔30جون (اے پی پی) محکمہ زراعت خیبر پختونخوا دا ایگریکلچر ایکسٹینشن ڈیپارٹمنٹ دے ضم تھیے قبائلی ضلعیاں دے کاشتکاراں اتے کساناں دی فصلاں دی پیداوار ودھاوݨ سانڳے اقدامات کریندا پئے جئیں نال ضم تھیے قبائلے ضلعیاں اچ زراعت دا شعبہ ودھسی جڈانجو علاقہ غذائی اجناس اتے ٻئی فصلاں اچ خود کفیل تھیسی۔ ڈائریکٹر زراعت ضلع کرم فیاض علی جان اے پی پی نال ڳالھ مہاڑ کریندیں ہوئیں آکھیا جو قبائلی ضلعے کرم زرخیزعلاقہ اے، ایگریکلچر ایکسٹینشن ڈیمپارٹمنٹ کرم ضلع اچ زراعت بارے ٻہوں اہم اقدامات شروع کیتن جئیں نال علاقے دی زرخیزی اتے فصلاں بارے ٻہوں پیشرفت تھئی اے، جئیں اچ مختف سبزیاں دی قسماں، بڄاں دی نویں قسماں کوں دریافت کرݨ،کاشتکاری دے نویں طریقے شامل ہن جئیں سانڳے اساں مختلف قصبیاں، دیہاتاں اچ اتھاں دی صلاحیت دے مطابق تربیت وی شروع کر رکھی اے۔ انہاں آکھیا جو سبزیاں دی پیداوار پہلے کرم اچ گھٹ تھیندی ہئی ہݨ ماشا ء اللہ محکمہ زراعت پاروں عوام کوں پتہ لڳ ڳئے اتے او سبزیاں سودھی ٻئی فصلاں دی نویں قسماں رہیندے پئن، پہلے پیداوار ادھی ہوندی ہئی ہݨ ݙو گناہ ودھ ڳئی اے۔ ضلع کرم دے مقامی کاشتکار جمعہ خان آکھیا جو میݙی ݙیڈھ جریب دا کھیت اے جئیں سانڳے ایگریکلچر ایکسٹینشن ڈیپارٹمنٹ ساکوں آلو دا بڄ ݙتے، جئیں نال انہاں دی آلو دی پیداوار ودھ ڳئی اے، او محکمہ زراعت دے ایگریکلچر ایکسٹینشن ڈیپارٹمنٹ توں ٻہوں خوش ہن جئیں پاروں انہاں دی پیداوار ودھی اے۔ ضلع کرم دے مقامی کسان رفیق حسین آکھیا جو انہاں دی فصلاں جیڑھی جو کھڑی حالت اچ لڳے ہوئے کاٹھیاں یعنی بناس اتے جال پاروں اساݙی فصلاں ٻہوں محفوظ تھی ڳئن جئیں پاروں زناور اتے مقامی لوک فصل اندر نی ونڄ سڳدے جئیں دا سارا کریڈٹ ایگریکلچر ایکسٹینشن ڈیپارٹمنٹ کوں ویندے جنہاں دے مشوریاں نال اساݙی فصلاں محفوظ تھین۔ سیڈ ڈیمانسٹریشن فارم انچارج ضلع کرم شاہد حسین آکھیا جو ایگریکلچر ایکسٹینشن ڈیپارٹمنٹ مقامی کساناں کوں ٹنل فارمنگ ݙیندے جڈناجو کساناں اتے کاشتکاراں کوں آف سیزن اچ مذکورہ ٹنل لاوݨ سانڳے سارے طریقہ کار بارے ݙسیا ویندے اتے ولا ونہاں ٹنل دا معائنہ کیتا ویندے۔ ٹنل فارمنگ لاوݨ نال آف سیزن ٹماٹر دی فصل لاتی ویندی اے۔ مقامی کسان جلال حسین آکھیا جو ایگریکلچر ایکسٹینشن ڈیپارٹمنٹ آلے ساکوں ٹنل فارمنگ لاوݨ دا طریقہ ݙسیندن جڈانجو انہاں کوں لاوݨ اچ اساݙی مدد وی کیتی ویندی اے، ایں ڈیپارٹمنٹ دی ٹریننگ اتے تعاون پاروں اساݙی فصلاں دی پیداوار ودھ ڳئی اے۔ انہاں آکھیا جو محمکمہ زراعت خصوصی طور ایگریکلچر ایکسٹینشن ڈیپارٹمنٹ دی مدد اتے تعاون مقامی کاشتکاراں نال جاری رہیا تاں آندے ݙو یا پنڄ سالیں اچ علاقے دی عوام دی تقدید بدل ویسی جڈانجو علاقہ زرعی اجناس اتے بئی فصلاں اچ خود کفیل تھی ویسی۔
