مسعود اشعر ملتان پریس کلب دے بانی صدر ہن، انہاں دے جنوبی پنجاب تے احسانات ہن ، ڈاکٹرانواراحمد، اصغر ندیم سید دا اظہارتعزیت

ملتان ۔6جولائی (اے پی پی):نامور صحافی، افسانہ نگار اتے دانشور مسعود اشعر دی ملتان نال پراݨی جڑت ہئی ۔ او خود اے آکھدے ہن جو میݙا ملتان نال گھاٹا ڳانڈھا اے ۔ انہاں 1967اچ ملتان پریس کلب دے بانی صدر دی حیثیت توں پریس کلب دی پہلی عمارت تعمیر کرائی۔ملتان دے صحافیاں اتے دانشوراں انہاں دے انتقال تے ݙکھ دا اظہار کیتے ۔ نامور دانشور اتے مقتدرہ قومی زبان دے سابق سربراہ ڈاکٹرانواراحمد آکھیے جو مسعود اشعر تہذیب اتے شائستگی کوں ودھارا ݙتے ۔ او رام پور توں ہجرت کرتے آئے ۔ اوعلمی وادبی خاندان توں تعلق رکھیندے ہن، اساں جیہے نینگراں دی انہاں بھرپور حوصلہ افزائی کیتی تے اساکوں لکھݨ دے موقع ݙتے ۔نامور ڈرامہ نگار اصغر ندیم سید آکھیے اے میݙا ذاتی ضیان اے ۔ ملتان اتے لاہور ݙوہیں شہراں اچ میڈی انہاں دے نال بھرپوررفاقت رہی۔زمانہ طالب علمی اچ انہاں میڈے کالم چھاپیے او آپݨے لکھاریاں دا ٻہوں حوصلہ ودھیندے ہن ۔معروف صحافی اتے سابق صدر ملتان پریس کلب رشید ارشد سلیمی آکھیے جو ملتان پریس کلب دی تعمیر اچ انہاں دے نال اے پی پی دے سابق اسٹیشن منیجر ملتان افضل خان ، اے کے درانی ،سینئر فوٹو گرافر رفیق اللہ خان اتے انور امرہوی بھرپور کردار ادا کیتا۔ملتان دی پہلی تریمت صحافی،افسانہ نگار اتے شاعرہ نوشابہ نرگس آکھیے جو او میڈے استاد ہن۔