جنیوا۔8جولائی (اے پی پی):عالمی ادارہ صحت چتاوݨی ݙتی اے جو کورونا وائرس دی عالمی وبا توں پوری دنیا اچ اموات گھٹ توں گھٹ 40 لکھ تھی ڳئن ، اتے حکومتاں کورونا وائرس دی وبا نال نبݨدے ویلھے پابندیاں گھٹ کرݨ اچ احتیاط کرن ۔ جرمن رساں ادارے موجب عالمی ادارہ صحت دے ڈائریکٹرجنرل ٹیڈروس ایڈہانوم گیبریسس گزریل ݙینھ آکھیے جو دنیا کورونا وائرس دی وبا اچ ھک خطرناک موڑ تے کھڑی اے کیوں جو کجھ ملکاں اچ ہݨ وی کورونا وائرس تکھیے کھنڈدا پئے اتے منتقلی تھیندی پئی اے جیں دی ھک وجہ کورونا ویکسین دی حیران کن حد تئیں غیرمنصفانہ تیاری اتے فراہمی اے جیں پاروں عالمی معیشت دی بحالی کوں وی خطرہ اے۔ لہذا ساریاں حکومتاں کورونا پابندیاں ہٹاوݨ اچ احتیاط نال کم گھنن تاں جو ایں وبا تے قابو پاتا ونڄ سڳے۔
