ملتان۔13جولائی (اے پی پی):ضلع ملتان اچ کورونا ویکسی نیشن مہم کوں تکھا کرݨ کیتے نویں حکمت عملی بݨا ڳھدی ڳئی اے ۔ جیندے تحت ڈپٹی کمشنر علی شہزاد سارے اداریں کوں ”نو ویکسی نیشن نو سروس“ دی ہدایات جاری کرݙتن۔ سرکاری محکمیں، نجی اداریں اتے بنکاں کوں ’’ نو ویکسی نیشن نو سروس‘‘ دے بورڈ لاوݨ دا حکم ݙتا ڳئے جݙاں جو سرکاری اداریں دے افسران توں سٹاف دی ویکسی نیشن دے سرٹیفکیٹ منگ ڳھدے ڳئن ۔نویں حکمت عملی دے تحت ویکسی نیشن نہ کراوݨ آلے ملازمین دیاں تنخواہیں بند کرݨ کیتے ڈسٹرکٹ اکاونٹس آفس کوں خط لکھیا ویسی ۔ سپیشل پرائس مجسٹریٹس دے ذریعے ریسٹورنٹس اتے مالزاچ ملازمین دے کورونا ویکسی نیشن سرٹیفکیٹ دی چیکنگ وی شروع کرݙتی ڳئی اے ۔ ݙوجھے پاسے ڈپٹی کمشنر محکمہ صحت کوں ہائیکورٹ، ڈسٹرکٹ کورٹس اتے مال ڈھور دیاں منڈیاں اچ کورونا ویکسی نیشن کیمپس لاوݨ دی ہدایت کرݙتی اے ۔
