ڈیرہ غازی خان ،مسافر بس تے ٹرالے دی ٹکر،عید تے گھر ونڄݨ آلے 27بندے جاں بحق،45 زخمی

ڈیرہ غازی خان۔19جولائی (اے پی پی):ڈیرہ غازی خان دے نیڑے مسافر بس تے ٹرالے اچ ٹکر پاروں 27بندے جاں بحق اتے 45 توں ودھ زخمی تھی ڳئن ۔ ریسکیو 1122دے ڈسٹرکٹ ایمرجنسی آفیسر ڈاکٹر نیئرعالم ݙسایا جو اے حادثہ سویلے ساݙھے 5 وڄے ڈیرہ غازی خان دے علاقے جھوک یارشاہ اچ اوں ویلھے تھئے جݙاں سیالکوٹ توں راجن پور ونڄݨ آلی بس تونسہ ڈیرہ غازی خان روڈ تے تکھی رفتارٹرالے دے نال ٹکرا ڳئی جیں دے نتیجے اچ 27بندے جاں بحق تھیوݨ دی تصدیق تھی ڳئی اے جݙاں جو سارے زخمیاں کوں ٹیچنگ ہسپتال ڈیرہ غازی خان منتقل کرݙتا ڳئے ۔ریسکیوحکام دے مطابق انہاں دی 19ایمبولینسیں امدادی کارروائیاں اچ شریک تھئن ۔ ٻہوں سارے زخمیاں دی حالت تشویش ناک ݙسائی ڳئی اے ،جاں بحق تے زخمی تھیوݨ آلے ٻہوں سارے لوک عید مناوݨ کیتے آپݨے گھر ویندے پئے ہن ۔ جاں بحق لوکاں دی شناخت دا عمل جاری اے۔