اسلام آباد۔2اگست(اے پی پی)وزیراعظم دے مشیر برائے تجارت عبدالرزاق دائود آکھیے جو ایں سال برآمدات دا ہدف 38.7 ارب ڈالر ہوسی، ملک توں موٹر سائیکل اتے موبائلز وی برآمد تھیوݨ لڳ ویسن۔ اے ڳالھ انہاں معاون خصوصی ڈاکٹر شہباز گل نال پریس کانفرنس کریندے آکھی۔ انہاں آکھیا جو 30 جون تئیں گڈز برآمدات اچ 25.3 فیصد ودھارا تھئے، جون اچ ریکارڈ برآمدات رہین، جولائی اچ برآمدات 2 ارب 30 کروڑ ڈالر رہین جیڑھیاں ایں مہینے دی ریکارڈ برآمدات ہین، اساں برآمدات ودھاوݨ سودھا ” میک ان پاکستان” پالیسی تے کم کریندے پئے ہیں۔ انہاں آکھیے جو پچھلے سال برآمدات دا ہدف 31.3 ارب ڈالر ہا، برآمدات اچ ودھ ودھارا آئی ٹی سیکٹر اچ 47 فیصد تھئے۔ ایں سال گڈز برآمدات 31.2 ارب ڈالر تئیں ڳھن ویسوں اتے سروسز برآمدات ساݙھے 7 ارب ڈالر تئیں ڳھن ویسوں اتے برآمدات دا ہدف 38.7 ارب ڈالر ہوسی۔ پاکستان برآمدات 40 ارب ڈالر دے ہدف تئیں ڳھن ونڄ سڳدے۔
