ملتان۔17اگست (اے پی پی):ریجنل پولیس آفیسر سید خرم علی آکھیے جو محرم الحرام دے جلوس اتے مجالس دی حفاظت سانگے پولیس ݙینھ رات مصروف عمل اے اتے ایں ڳال کوں یقینی بݨایا ڳئے جو متبادل رستے دے ذریعے ٹریفک دی روانی کوں وی برقرار رکھیا ویسی ۔اے ڳال انہاں شہر دی مختلف امام بارگاہواں دے حفاظتی انتظامات دا جائزہ گھندے ہوئیں امام بارگاہواں دی انتظامیہ نال ڳال مہاڑ کریندے ہوئیں آکھی اے ، ایں موقع تے سٹی پولیس آفیسر ملتان منیر مسعود مارتھ وی انہاں دے رلے ہن ۔ آر پی او سید خرم علی جلوس تعزیہ استاد شاگرد، جلوس امام بارگاہ حویلی مرید شاہ اتے ٻئے جلوساں دے سکیورٹی انتظامات دا وی جائزہ ڳھدے۔ انہاں آکھیے جو جلوساں ،مجالس دی حفاظت یقینی بݨاوݨ کیتے پولیس ولوں ہرممکن اقدامات کیتے ڳئن ،امن و امان برقرار رکھݨ سانگے پولیس پورے طور تے تکڑی اے ،مجالس اتے جلوساں دے شرکا کوں پرامن ماحول ݙتا ویندا پئے۔
