اسلام آباد۔20اگست (اے پی پی) پاکستان دے بہادر سپوت، اعلیٰ ترین فوجی اعزاز نشان حیدر گھنݨ آلے گھٹ عمر ترین پائلٹ آفیسر راشد منہاس شہید دے ۵۰ویں یومِ شہادت دے موقع تے انہاں کوں خراج عقیدت پیش کرݨ کیتے پاک فضائیہ دے شعبہ تعلقات عامہ ہک مختصر دستاویزی فلم جاری کر ݙتی اے ۔پائلٹ آفیسر راشد منہاس شہید 17 فروری 1951 کوں ڄمیے ہن۔ ملکی فضائی سرحداں دی حفاظت دے جذبے نال سرشار راشد منہاس 14 مارچ 1971 کوں پاک فضائیہ دے 51ویں جی ڈی پی کورس اچ کمیشن حاصل کیتا۔ بعد اچ انہاں کوں آپریشنل کنورژن کورس کیتے ماڑی پور (مسرور) اچ واقع نمبر 2 اسکواڈرن اچ تعینات کیتا ڳیا جتھاں رب کائنات انہاں دے قمدر اچ لازوال رفعتاں لکھ ݙتی۔ 20 اگست 1971 دے ݙینھ راشد منہاس دی قربانی نال ہک ناقابل فراموش داستان رقم تھئی۔ ایں ݙینھ راشد آپݨے انسٹرکٹر پائلٹ فلائیٹ لیفٹیننٹ مطیع الرحمان دے ناپاک عزائم کوں مٹی اچ پا ݙتا جئیں انہاں دے ٹ-33 تربیتی طیارے کوں ہائی جیک کر تے بھارت گھن ونجݨ دی کوشش کیتی۔ راشد جہاز دا کنٹرول واپس گھنݨ دی پوری جدوجہد کیتی اتے ایں توں پہلے جو جہاز ملکی سرحد پار کر ویندا اونکوں زمین بوس کرݨ کوں ترجیح ݙتی۔ انہاں دی ایں وݙی قربانی دے اعتراف اچ پاکستان دی حکومت انہاں کوں ملک دا ساریاں توں وݙا فوجی اعزاز نشان حیدر ݙتا۔
