اسلام آباد۔23اگست (اے پی پی):صدر مملکت ڈاکٹرعارف علوی آکھیے جو پاکستان آسٹریلیا دے نال آپݨے تعلقات کوں ٻہوں اہمیت ݙیندے تے سانجھی دلچسپی دے سارے شعبیں اچ آسٹریلیا دے نال ݙو طرفہ تعاون کوں مزید تکڑا بݨاوݨ چاہندے ۔ تعلیم اور پیشہ ورانہ تربیت دے شعبیں اچ آسٹریلیا دے نال تعاون کوں ودھارا ݙیوݨ دی لوڑھ اے جیڑھا جو پاکستان دی سماجی و اقتصادی ترقی اچ معاون ثابت تھیسی ۔ صدر اے ڳال وزارت خارجہ دے سبکدوش تھیوݨ آلے ترجمان اتے آسٹریلیا اچ پاکستان دے نامزد ہائی کمشنر زاہد حفیظ چوہدری نال ڳال مہاڑ کریندے ہوئیں آکھی اے جنہاں سنوار کوں ایوان صدر اچ انہاں نال ملاقات کیتی ۔ ݙوہیں ملکاں وچال ݙو پاسے تعلقات دے مختلف پہلواں تے ڳال کریندے ہوئیں صدر زور ݙتے جو پاکستان اتے آسٹریلیا دے درمیان تجارتی اتے اقتصادی تعاون ودھاوݨ دے ٻہوں سارے امکانات ہن ، انہاں آکھیے جو پاکستان آسٹریلیا دے نال مختلف شعبیں بالخصوص تعلیم ، زراعت ، تجارت ، پاݨی دے انتظام ، کان کنی اتے انفارمیشن ٹیکنالوجی (آئی ٹی) اچ ݙوپاسے تعاون ودھاوݨ چاہندے ۔
