اسلام آباد۔24اگست (اے پی پی) وفاقی وزیر سائنس و ٹیکنالوجی سینیٹر سید شبلی فراز نال پرتگال دے سفیر پالو نیویس پوسِنہو اتھاں ملاقات کیتی۔ منگل کوں تھیوݨ آلی ملاقات اچ ݙوہیں ملکاں اچ سائنس اتے ٹیکنالوجی دے شعبیاں اچ رابطے ودھاوݨ بارے ڳالھ مہاڑ تھئی۔ ایں موقع تے وفاقی وزیر سائنس و ٹیکنالوجی آکھیا جو پرتگال ہک چھوٹا جیھا اہم ملک اے، پاکستان اتے پرتگال دوستانہ تعلقات دی تاریخ رکھدن۔ اساں پرتگال توں سائنس تے ٹیکنالوجی دے شعبیاں اچ تعاون اتے سانجھے منصوبے چاہندوں۔ پرتگال دے سفیر آکھیا جو پرتگال اڄ کل سائنس اتے ٹیکنالوجی دی ترقی تے ودھ توجہ ݙیندا پئے اتے سائنس اتے ٹیکنالوجی بارے تجویزاں اتے درمیانے درجے دے کاروباری ادارے بݨاوݨ دا خیر مقدم کریندے۔
